پاکستان خوش قوموں کی فہرست میں بھارت سے کہیں آگے، گیلپ سروے میں انکشاف

گیلپ پاکستان کے حالیہ سروے کے نتائج نے ایک خوشگوار خبر سنائی ہے، جس کے مطابق پاکستانی قوم دنیا کی خوش ترین اقوام میں شامل ہو گئی ہے اور اپنے روایتی حریف بھارت کو خوشی کے میدان میں بھی پیچھے چھوڑ دیا ہے۔

گیلپ کے عالمی خوشی انڈیکس کے مطابق پاکستان 44 ممالک کی فہرست میں 8ویں نمبر پر ہے۔ سروے کے مطابق 72 فیصد پاکستانیوں نے تمام تر معاشی، سماجی اور سیاسی چیلنجز کے باوجود اپنی زندگی سے اطمینان اور خوشی کا اظہار کیا ہے۔

دوسری جانب بھارت کو اس سروے میں آخری نمبروں میں جگہ ملی۔ رپورٹ کے مطابق صرف 31 فیصد بھارتی شہریوں نے خود کو خوش قرار دیا، جب کہ 34 فیصد نے کھل کر اپنی مایوسی کا اظہار کیا۔

سروے میں یہ بھی بتایا گیا کہ چین خوش ترین قوم قرار پایا ہے، جہاں 86 فیصد عوام نے زندگی سے بھرپور خوشی محسوس کرنے کی بات کی۔ دلچسپ بات یہ ہے کہ چینی عوام نے خوشی کے معاملے میں یورپی اقوام کو بھی پیچھے چھوڑ دیا ہے۔