پاکستان میں اسٹار لنک انٹرنیٹ سروس کی رجسٹریشن جاری، پی ٹی اے کی تصدیق

پاکستان ٹیلی کمیونیکیشن اتھارٹی (PTA) نے تصدیق کی ہے کہ اسپیس ایکس کی سیٹلائٹ انٹرنیٹ سروس اسٹار لنک کی رجسٹریشن کا عمل جاری ہے۔

یہ پیشرفت بارسلونا میں منعقدہ GSMA موبائل ورلڈ کانگریس 2025 کے دوران پی ٹی اے کے چیئرمین میجر جنرل (ر) حفیظ الرحمن اور اسٹار لنک کی ٹیم کے درمیان ہونے والی اعلیٰ سطحی ملاقات کے بعد سامنے آئی ہے۔ ملاقات میں پاکستان میں سستے اور تیز رفتار انٹرنیٹ کی فراہمی، خاص طور پر دور دراز علاقوں میں ڈیجیٹل خلا کو کم کرنے پر تبادلہ خیال کیا گیا۔

پی ٹی اے نے ملک بھر میں سیٹلائٹ انٹرنیٹ ٹیکنالوجی کے فروغ اور جدید ڈیجیٹل سہولیات کی فراہمی کے عزم کا اظہار کیا ہے۔ تاہم، اسٹار لنک کو پاکستان میں اپنی خدمات شروع کرنے کے لیے تمام ریگولیٹری منظوریوں کو مکمل کرنا ہوگا۔

ٹیکنالوجی کے معروف سرمایہ کار ایلون مسک پہلے ہی اس بات کی تصدیق کر چکے ہیں کہ اسٹار لنک نے پاکستان میں کام کے لیے سرکاری منظوری کی درخواست دے دی ہے اور حکومت کے فیصلے کا انتظار کر رہا ہے۔ دوسری جانب، پاکستان کی قائمہ کمیٹی برائے آئی ٹی و ٹیلی کمیونیکیشن نے پی ٹی اے پر زور دیا ہے کہ وہ اسٹار لنک کی منظوری کے عمل کو تیز کرے۔

اگر اسٹار لنک کو منظوری مل جاتی ہے تو یہ پاکستان کے پسماندہ اور دور دراز علاقوں میں انٹرنیٹ کے انقلاب کا سبب بن سکتا ہے، جہاں لاکھوں افراد اب بھی تیز رفتار اور مستحکم انٹرنیٹ سے محروم ہیں۔ ماہرین کا ماننا ہے کہ اسٹار لنک کی سروس ملک میں ڈیجیٹل ترقی اور اقتصادی مواقع پیدا کرنے میں اہم کردار ادا کرے گی۔