پاکستان میں عیدالفطر کب ہوگی؟ ماہرین نے تاریخ بتادی

رویتِ ہلال ریسرچ کونسل کے سیکرٹری جنرل خالد اعجاز مفتی کے مطابق، پاکستان میں عید الفطر 2025 پیر، 31 مارچ کو منائے جانے کا امکان ہے۔ ان کے مطابق نیا چاند 29 مارچ بروز ہفتہ شام 3 بجکر 58 منٹ پر پیدا ہوگا، اور 30 مارچ بروز اتوار کو غروبِ آفتاب کے وقت اس کی عمر 26 گھنٹے سے زائد ہوگی، جو چاند نظر آنے کے لیے کافی سمجھی جاتی ہے۔

خالد اعجاز مفتی نے مزید وضاحت کی کہ چاند دیکھنے کے لیے اس کی عمر غروبِ آفتاب کے وقت کم از کم 18 گھنٹے ہونی چاہیے، اور اس موقع پر یہ شرط پوری ہو رہی ہے۔ اس کے علاوہ، مختلف شہروں میں غروبِ آفتاب اور غروبِ ماہتاب کے درمیان فرق 40 منٹ سے زیادہ ہوگا، جو چاند نظر آنے کے لیے ضروری ہوتا ہے۔

رویتِ ہلال ریسرچ کونسل کے مطابق، اگر موسم صاف رہا تو 30 مارچ کی شام کو چاند دیکھنے میں کوئی مشکل پیش نہیں آئے گی، جس کے بعد 31 مارچ کو ملک بھر میں عید الفطر منائی جائے گی۔ تاہم، حتمی اعلان مرکزی رویتِ ہلال کمیٹی کرے گی، جو 30 مارچ کو چاند دیکھنے کے بعد فیصلہ کرے گی۔