پی آئی اے کا بعد از حج آپریشن کامیابی سے مکمل

قومی ایئر لائن پی آئی اے کا بعد از حج آپریشن جمعرات کی شب کامیابی سے مکمل ہو گیا۔

ترجمان پی آئی اے کے مطابق مدینہ سے اسلام آباد آنے والی آخری حج پرواز رات 8:30 بجے پہنچی۔ پی آئی اے نے 10 جون سے 10 جولائی تک جاری رہنے والے آپریشن کے دوران 147 پروازوں کے ذریعے 41,500 سے زائد حجاج کو وطن واپس پہنچایا۔

حج پروازوں کی 90 فیصد سے زائد روانگیاں شیڈول کے مطابق ہوئیں، جبکہ آپریشن کراچی، لاہور، اسلام آباد، پشاور، کوئٹہ اور ملتان سے کیا گیا۔ بوئنگ 777 اور ایئربس 320 طیارے استعمال کیے گئے۔

حجاج کرام نے پی آئی اے کی خدمات پر اطمینان کا اظہار کیا، جبکہ سی ای او عامر حیات نے کامیاب آپریشن پر تمام ٹیموں کو مبارکباد دی۔