کراچی: آسمان پر شہابِ ثاقب کے نظارے نے سب کو حیران کردیا

شہر قائد کے آسمان پر شہابِ ثاقب کا شاندار منظر دیکھنے والوں کو حیرت میں مبتلا کر دیا۔

تفصیلات کے مطابق، کراچی کے آسمان پر اتوار اور پیر کی درمیانی شب شہابِ ثاقب کا ایک خوبصورت منظر دیکھا گیا، جسے بڑی تعداد میں شہریوں نے دیکھا اور کیمرے میں قید کر لیا۔ یہ ویڈیو سوشل میڈیا پر وائرل ہو گئی۔ شہابِ ثاقب رات 2:43 پر آسمان پر گزرتے ہوئے دکھائی دیا۔

شہابِ ثاقب عربی لفظ ہے جس کے معنی ہیں "دھکتا ہوا شعلہ” اور "سوراخ کرنے والا”۔ ماہرین کے مطابق لاکھوں شہاب ثاقب زمین کے گرد چکر لگاتے ہیں، جنہیں عوامی طور پر "شوٹنگ اسٹارز” کہا جاتا ہے۔ ایسے واقعات سالانہ یا مخصوص وقفوں پر پیش آتے ہیں۔

ماہرین فلکیات کے مطابق شہاب ثاقب سیارچے کے ٹکڑے ہیں جو زمین کی فضا میں داخل ہوتے وقت آکسیجن اور کشش ثقل کی وجہ سے جل کر روشنی پیدا کرتے ہیں، جو انہیں دلکش بناتی ہے۔

ناسا کے مطابق روزانہ 100 سے 300 ٹن خلائی مٹی اور چٹانیں زمین پر گرتی ہیں، لیکن ان کا سائز عام طور پر ریت کے ایک دانے سے زیادہ نہیں ہوتا۔ تاہم، اگر بڑے شہاب ثاقب زمین سے ٹکراتے ہیں تو وہ تباہ کن اثرات مرتب کر سکتے ہیں۔