کسی بھی قسم کی مہم جوئی کا بھرپور طاقت سے جواب دیں گے، اسحاق ڈار

اسلام آباد: نائب وزیراعظم اسحاق ڈار نے کہا کہ پہلگام واقعہ کے بعد بھارت نے غیر ذمہ دارانہ اور جارحانہ رویہ اختیار کیا۔ کسی بھی قسم کی مہم جوئی کا بھرپور طاقت سے جواب دیں گے۔

ڈی جی آئی ایس پی آر اور ترجمان دفتر خارجہ کے ساتھ پریس کانفرنس کرتے ہوئے نائب وزیر اعظم نے کہا کہ بھارت کے غیر قانونی اقدامات اور بیانات نے صورتحال کو پیچیدہ کر دیا ہے۔ آج اس پریس کانفرنس کا مقصد موجودہ صورتحال سے سب کو آگاہ کرنا ہے۔ مختلف ملکوں کے رہنماؤں سے بھی خطے کی صورتحال پر بات چیت ہوئی ہے۔

انہوں نے کہا کہ پاکستان ہر قسم کی دہشت گردی کی مذمت کرتا ہے۔ دہشتگردوں کے ہاتھوں پاکستان نے جتنا نقصان اٹھایا اتنا کسی ملک کو نہیں ہوا۔ پاکستانی قوم اور اداروں نے دہشت گردی کا جواں مردی سے مقابلہ کیا۔ دہشت گردی کے خاتمے کیلئے پاکستان نے عالمی برادری کے ساتھ مل کر کام کیا۔

اسحاق ڈار نے کہا کہ بھارت پاکستان سمیت مختلف ملکوں میں دہشت گردی میں ملوث ہے۔ دہشت گردی کے ہر واقعہ پر الزام تراشی بھارت کا وطیرہ ہے۔ بھارتی حکومت کی طرف سے مذموم سیاسی مقاصد کیلئے ایسے واقعات کا استعمال ہوتا ہے۔ انہوں نے مزید کہا کہ بھارتی قیادت اپنی ناکامیوں سے توجہ ہٹانے کیلئے مختلف ہتھکنڈے استعمال کرتی ہے۔ بھارت مقبوضہ کشمیر میں آزادی کی تحریک کو دہشت گردی سے منسلک کرنا چاہتا ہے۔ مقبوضہ کشمیر کے عوام کے حقوق کچلنے کیلئے بھارت نے کالے قوانین کا سہارا لیا۔ نہتے شہریوں کو نشانہ بنانے کی کوئی بھی کارروائی ناقابل قبول ہے۔

نائب وزیر اعظم نے کہا کہ اقوام متحدہ کی قراردادوں میں کشمیر کو متنازعہ علاقہ تسلیم کیا گیا۔ پورا خطہ بھارت کے غیر ذمہ دارانہ اقدامات کی وجہ سے خطرے میں ہے۔ بھارت خطے میں دہشت گردی اور انتہا پسندی کو ہوا دے رہا ہے۔ وزیراعظم نے پہلگام واقعہ کی غیر جانبدارانہ اور شفاف تحقیقات میں تعاون کی پیشکش کی۔ غور کرنا ہوگا کہ بھارت نے یہ مہم جوئی کیوں کی اور مقاصد کیا ہیں ؟

انہوں نے کہا کہ کوئی فریق سندھ طاس معاہدے کو یکطرفہ طور پر ختم نہیں کر سکتا۔ سندھ طاس معاہدے سے متعلق بھارتی بیان عالمی قوانین کی صریحاً خلاف ورزی ہے۔ پانی پاکستان کے 24 کروڑ عوام کیلئے لائف لائن ہے۔ قومی سلامتی کمیٹی نے واضح کر دیا سندھ طاس معاہدے کی خلاف ورزی برداشت نہیں ہوگی۔