کوالالمپور: ویمنز انڈر 19 ٹی 20 ورلڈ کپ کے لیے قومی ٹیم کی ملائیشیا آمد

کوالالمپور: ویمنز انڈر 19 ٹی 20 ورلڈ کپ کے لیے پاکستانی ٹیم کومل خان کی قیادت میں ملائیشیا پہنچ گئی۔ ٹیم کو ایئرپورٹ پر پاکستانی کمیونٹی نے بھرپور جوش و خروش سے استقبال کیا اور پاکستان زندہ باد کے نعرے لگائے۔

پاکستانی ٹیم کے کپتان کومل خان نے کہا کہ ٹیم نے مکمل تیاری کی ہے اور کھلاڑیوں کا مورال بلند ہے۔ وہ گروپ میچ جیتنے کے لیے بھرپور محنت کریں گے۔

ہیڈ کوچ محسن کمال نے میڈیا سے گفتگو کرتے ہوئے کہا کہ پلیئرز پر بھرپور محنت کی گئی ہے اور پاکستانی ٹیم ایشیا کپ سے مختلف نظر آئے گی۔ انہوں نے مزید کہا کہ ٹیم آج آرام کرے گی۔

آئی سی سی انڈر 19 ویمنز ٹی ٹوئنٹی ورلڈ کپ 18 جنوری سے 2 فروری تک ملائیشیا میں کھیلا جائے گا۔ پاکستانی ٹیم گروپ بی میں شامل ہے، جس میں انگلینڈ، آئرلینڈ اور امریکا کی ٹیمیں بھی موجود ہیں۔ پاکستان اپنا پہلا میچ 18 جنوری کو امریکا کے خلاف کھیلے گا، دوسرا میچ 20 جنوری کو انگلینڈ کے خلاف ہوگا، اور تیسرا میچ 22 جنوری کو آئرلینڈ کے خلاف کھیلا جائے گا۔