کوہلی کا کیچ، مداحوں نے سوشل میڈیا پر غلط فلپس کو تنقید کا نشانہ بنا ڈالا

بھارت کے اسٹار بلے باز ویرات کوہلی کا شاندار کیچ پکڑنے پر اُن کے مداحوں نے غلط فلپس کو تنقید کا نشانہ بنا ڈالا۔ یہ غلطی سوشل میڈیا پر وائرل ہوگئی۔

آئی سی سی چیمپئنز ٹرافی کے میچ میں نیوزی لینڈ کے کھلاڑی گلین فلپس نے جب بھارتی بیٹر کا مشکل کیچ پکڑ کر آوٹ کیا تو ویرات کے فینز نے کھلاڑی فلپس کو تنقید کا نشانہ بنانے کی بجائے فلپس انڈیا کو آڑے ہاتھوں لے لیا۔

دبئی میں کھیلا گیا یہ میچ کوہلی کا 300 واں ون ڈے تھا، مگر وہ صرف 11 رنز بنا کر پوائنٹ پر کیچ ہو گئے۔ اس موقع پر ان کی بیوی انوشکا شرما بھی اسٹرینڈز میں حیران و پریشان نظر آئیں۔

میچ کے بعد، غصے میں بھرے کوہلی کے مداحوں نے فلپس انڈیا کے انسٹاگرام پیج پر کمنٹس کی بھرمار کر دی، یہ سوچتے ہوئے کہ یہ فیلڈر کا اکاؤنٹ ہے۔ ایک مداح نے تو یہاں تک سوال کر دیا، "آپ نے کوہلی کو کیوں آؤٹ کیا؟” جس کے بعد دیگر مداحوں نے اس غلط فہمی کو درست کیا۔