4 مارچ سے ملک میں پیٹرول پمپس بند؟

آل پاکستان پیٹرولیم ڈیلرز ایسوسی ایشن نے 4 مارچ کو ملک بھر میں پیٹرول پمپس بند رکھنے کا اعلان کیا ہے۔

پاکستان پیٹرولیم ڈیلرز ایسوسی ایشن کے چیئرمین عبدالصمد خان نے پریس کانفرنس میں ہڑتال سے خود کو الگ کرتے ہوئے کہا کہ 4 مارچ کو پیٹرول پمپ بند کرنے کے اعلان کا ان کی ایسوسی ایشن سے کوئی تعلق نہیں ہے۔

عبدالصمد خان نے اس بات پر زور دیا کہ وہ رمضان المبارک کے دوران کسی کو تکلیف نہیں دینا چاہتے اور وہ پٹرولیم مصنوعات کی ڈی ریگولیشن کے مخالف ہیں۔ انہوں نے یہ بھی نشاندہی کی کہ ڈی ریگولیشن کے بعد سے اسمگلنگ میں اضافہ ہوا ہے اور وزارت پٹرولیم نے اس کی روک تھام کے لیے کوئی کارروائی نہیں کی۔

پاکستان پیٹرولیم ڈیلرز کے چیئرمین نے یہ بھی بتایا کہ گزشتہ تین سالوں سے پیٹرولیم مصنوعات کو ڈی ریگولیٹ کرنے کی کوششیں جاری تھیں۔ ہڑتال کی کال دی گئی تو انہیں اسلام آباد بلایا گیا لیکن انہوں نے شرکت کرنے سے انکار کر دیا۔ انہوں نے دعویٰ کیا کہ انہیں بغیر کسی مشاورت کے اچانک ڈی ریگولیشن کے بارے میں مطلع کیا گیا اور انہیں دھمکیاں بھی دی گئیں لیکن وہ ڈٹے رہے۔

ان کا مزید کہنا تھا کہ اگر ڈی ریگولیشن ہوتی ہے تو اس سے کمپنیوں کی جانب سے اسمگل شدہ مصنوعات کی فروخت شروع ہوجائے گی، اور ڈیلرز پیٹرولیم مصنوعات کی ڈی ریگولیشن کیلئے تیار نہیں ہیں۔ اگر یہ اقدام آگے بڑھا تو وہ پمپ بند کر دیں گے۔