یورپ کے 7ممالک جہاں سٹوڈنٹس کے لیے مستقل رہائش حاصل کرنا آسان ہے

یورپ میں اعلیٰ تعلیم حاصل کرنا نہ صرف معیاری تعلیم اور عالمی سطح پر تسلیم شدہ ڈگریوں کا ذریعہ بنتا ہے، بلکہ یہ مستقبل میں مستقل رہائش (PR) کے خواب کی تعبیر کا دروازہ بھی کھول سکتا ہے۔ اگر آپ بھی یورپ میں تعلیم حاصل کرنے کا ارادہ رکھتے ہیں اور بعد از تعلیم وہیں رہائش اختیار کرنے کا منصوبہ رکھتے ہیں، تو یہ سات یورپی ممالک آپ کے لیے بہترین انتخاب ثابت ہو سکتے ہیں۔ ان ممالک میں طالبعلموں کو تعلیم مکمل کرنے کے بعد قانونی طور پر کام کرنے اور پھر مستقل رہائش حاصل کرنے کے نسبتاً آسان مواقع فراہم کیے جاتے ہیں۔

1. فرانس:
فرانس میں تعلیم مکمل کرنے والے غیر ملکی طلبہ کو "APS” پرمٹ کے تحت 24 ماہ کا وقت دیا جاتا ہے تاکہ وہ نوکری تلاش کر سکیں یا اپنا کاروبار شروع کریں۔ اس عرصے میں ملازمت حاصل کرنے پر ورک پرمٹ ملتا ہے، جو مستقبل میں مستقل رہائش کے حصول کی بنیاد بن سکتا ہے۔

2. جرمنی:
جرمنی میں تعلیم مکمل کرنے والے طلبہ کو 18 ماہ کا جاب سرچ ویزا دیا جاتا ہے۔ اگر اس مدت کے دوران ملازمت مل جائے تو EU بلو کارڈ یا ورک ویزا حاصل کیا جا سکتا ہے، جو مستقل سکونت کے لیے راہ ہموار کرتا ہے۔

3. برطانیہ:
برطانیہ میں فارغ التحصیل طلبہ "گریجویٹ روٹ” کے تحت 2 سال (پی ایچ ڈی طلبہ کے لیے 3 سال) تک بغیر سپانسر کے کام کر سکتے ہیں۔ اس کے بعد وہ سکلڈ ورکر ویزا کے تحت مستقل رہائش (Indefinite Leave to Remain) کی درخواست دے سکتے ہیں۔

4. ناروے:
ناروے ان چند ممالک میں شامل ہے جہاں صرف تین سال کی قانونی رہائش کے بعد PR ممکن ہے، بشرطیکہ درخواست دہندہ زبان کی مہارت، مکمل وقتی ملازمت اور خود کفالت ثابت کر سکے۔

5. آئرلینڈ:
آئرلینڈ میں تعلیم مکمل کرنے کے بعد غیر ملکی طلبہ کو 1 سے 2 سال کا ورک پرمٹ دیا جاتا ہے، جس کے دوران وہ کسی ورک ویزا کے بغیر کام کر سکتے ہیں۔ اس کے بعد اگر وہ کریٹیکل اسکلز یا جنرل ایمپلائمنٹ پرمٹ حاصل کر لیں تو پانچ سال میں PR کی درخواست دی جا سکتی ہے۔

6. فن لینڈ:
فن لینڈ میں فارغ التحصیل ہونے کے بعد طلبہ کو دو سال کا ورک سرچ پرمٹ ملتا ہے۔ ملازمت حاصل ہونے پر ورک پرمٹ اور 4 سال کی قانونی رہائش کے بعد مستقل رہائش ممکن ہے۔

7. ڈنمارک:
ڈنمارک میں PR حاصل کرنے کے دو راستے ہیں: عام راستے میں آٹھ سال جبکہ فاسٹ ٹریک میں صرف چار سال کے اندر مستقل رہائش ممکن ہے، اگر درخواست گزار زبان کا امتحان، مکمل وقتی ملازمت، سوسائٹی میں شمولیت اور آمدنی کی شرائط پوری کرتا ہو۔