ایک بندر نے پورے ملک کی بجلی بند کردی

سری لنکا میں اتوار کی صبح پورے ملک میں بجلی کا بریک ڈاؤن ہوا، حکام نے بجلی کی بندش کی ذمہ داری ایک بندر پر ڈال دی۔

بجلی کا بریک ڈاؤن جنوبی کولمبو کے سیلون الیکٹریسٹی بورڈ کے گرڈ اسٹیشن میں خرابی کی وجہ سے شروع ہوا، جس کے باعث شہریوں کو شدید مشکلات کا سامنا کرنا پڑا اور اسپتالوں کو جنریٹرز پر منتقل ہونا پڑا۔

سری لنکن حکام کے مطابق تین گھنٹوں کی محنت کے بعد بیشتر علاقوں میں بجلی بحال کر دی گئی ہے۔

وزیر توانائی کمارا جیاکوڈے کے مطابق، ایک بندر گرڈ اسٹیشن میں داخل ہوگیا تھا جس کی وجہ سے خرابی پیدا ہوئی اور بجلی کی فراہمی معطل ہوگئی۔

اس سے پہلے 2022 میں سری لنکا کو معاشی بحران کے دوران تیل کی کمی کی وجہ سے بھی طویل بریک ڈاؤن کا سامنا کرنا پڑا تھا۔