عدیل اکبر کی چھٹی کی درخواست اور میڈیکل رپورٹ منظر عام پر

اسلام آباد — مبینہ طور پر خودکشی کرنے والے ایس پی عدیل اکبر کے حوالے سے تحقیقات میں نیا انکشاف سامنے آیا ہے۔ پولیس ذرائع کے مطابق، ان کی چھٹی کی درخواست اور میڈیکل رپورٹ منظر عام پر آ گئی ہے، جس میں بتایا گیا ہے کہ وہ ڈینگی بخار میں مبتلا تھے۔

تفصیلات کے مطابق، میڈیکل رپورٹ میں تصدیق کی گئی ہے کہ ایس پی عدیل اکبر کا ڈینگی ٹیسٹ مثبت (پازیٹیو) آیا تھا۔ رپورٹ کے مطابق، انہوں نے 20 اکتوبر کو پولی کلینک اسپتال سے چیک اپ کرایا اور بیماری کے باعث تین روز کی میڈیکل چھٹی کی درخواست ڈی آئی جی اسلام آباد کو جمع کرائی، جو منظور کر لی گئی تھی۔

ذرائع کا کہنا ہے کہ ایس پی عدیل اکبر نے چھٹی مکمل ہونے کے بعد 23 اکتوبر کو دوبارہ ڈیوٹی جوائن کی تھی۔ مزید بتایا گیا ہے کہ ان کا بیرونِ ملک ایک یونیورسٹی میں داخلہ ہو چکا تھا اور وہ دفترِ خارجہ میں تعلیمی دستاویزات کی تصدیق کے لیے بھی گئے تھے۔

 یہ بھی پڑھیں : اسلام آباد پولیس کے ایس پی عدیل اکبر کی مبینہ خودکشی

پولیس ذرائع کے مطابق، واقعے کے ابتدائی شواہد سے لگتا ہے کہ ایس ایم جی گن حادثاتی طور پر چل گئی۔ پولیسنگ ماہرین کے مطابق، فائر کا 65 ڈگری زاویہ (اینگل) اس بات کی نشاندہی کرتا ہے کہ یہ واقعہ حادثاتی ہو سکتا ہے۔

ماہرین کا کہنا ہے کہ پی ایس پی افسران عام طور پر ایس ایم جی گن کے استعمال میں زیادہ مہارت نہیں رکھتے، جس سے حادثے کے امکانات مزید بڑھ جاتے ہیں۔

اسلام آباد پولیس نے واقعے کی تحقیقات کو مزید وسعت دے دی ہے تاکہ واقعے کی نوعیت اور اصل وجوہات کا مکمل تعین کیا جا سکے۔