افغانستان کے موجودہ حالات کی ذمہ داری طالبان حکومت پر عائد ہوتی ہے، احمد مسعود

افغان سیاستدان اور نیشنل ریزسٹنس فرنٹ کے رہنما احمد مسعود نے کہا ہے کہ افغانستان کو درپیش موجودہ حالات کی بنیادی وجہ ملک میں شدت پسند گروہوں کی سرگرمیاں اور موجودہ حکومتی پالیسیوں کے اثرات ہیں۔

ایک تقریب سے خطاب کرتے ہوئے احمد مسعود کا کہنا تھا کہ افغانستان میں سیکیورٹی صورتحال بدستور پیچیدہ ہے اور مختلف شدت پسند تنظیموں کی موجودگی خطے کے امن و استحکام کے لیے بڑا چیلنج بن چکی ہے۔

انہوں نے کہا کہ اگر ان مسائل پر سنجیدہ توجہ نہ دی گئی تو اس کے اثرات نہ صرف افغانستان بلکہ پورے خطے پر مرتب ہو سکتے ہیں۔ احمد مسعود کے مطابق افغانستان میں متعدد شدت پسند گروہ سرگرم ہیں جن کی وجہ سے ملک کو مسلسل سیکیورٹی مسائل کا سامنا ہے۔

ان کا کہنا تھا کہ افغانستان میں پائیدار امن کے قیام کے لیے ضروری ہے کہ شدت پسند عناصر کے خلاف مؤثر اقدامات کیے جائیں اور ملک کو عدم استحکام سے نکالا جائے۔

دفاعی و سیاسی امور کے ماہرین کے مطابق افغانستان میں جاری غیر یقینی صورتحال کے باعث عام شہریوں کو مشکلات کا سامنا ہے جبکہ خطے کے امن کے لیے بھی یہ صورتحال تشویش کا باعث بن رہی ہے۔