ایشیا کپ 2025 کا شیڈول جاری، پاکستان اور بھارت گروپ اے میں شامل

ایشیا کپ 2025 کا شیڈول جاری کر دیا گیا ہے جس کے مطابق پاکستان، بھارت، یو اے ای اور عمان گروپ اے میں شامل ہیں جبکہ بنگلہ دیش، سری لنکا، افغانستان اور ہانگ کانگ گروپ بی میں کھیلیں گے۔

ایشیا کپ کا افتتاحی میچ 9 ستمبر کو افغانستان اور ہانگ کانگ کے درمیان ہوگا۔ پاکستان کا پہلا میچ 12 ستمبر کو عمان کے خلاف ہے، جبکہ پاکستان اور بھارت کے درمیان گروپ میچ 14 ستمبر کو کھیلا جائے گا۔ پاکستان کا تیسرا گروپ میچ 17 ستمبر کو یو اے ای کے خلاف ہوگا۔

20 ستمبر سے سپر فور مرحلہ شروع ہوگا، جس میں بی گروپ کے نمبر ون اور نمبر ٹو کے درمیان، اور 21 ستمبر کو اے گروپ کے نمبر ون اور نمبر ٹو کے درمیان میچز ہوں گے۔ پاکستان اور بھارت کا سپر فور میں مقابلہ 21 ستمبر کو ممکن ہے۔

ایشین کرکٹ کونسل کے صدر محسن نقوی نے اعلان کیا کہ ایشیا کپ 9 سے 28 ستمبر تک متحدہ عرب امارات میں منعقد ہوگا۔