بابوسر سیلاب حادثہ: ڈاکٹر مشعال کے 3 سالہ بیٹے عبدالہادی کی لاش مل گئی

گلگت بلتستان کے علاقے بابوسر ٹاپ کے قریب سیلابی ریلے میں لاپتا ہونے والے 3 سالہ عبدالہادی کی لاش ڈاسر کے مقام سے برآمد کر لی گئی۔

بچے کی لاش آر ایچ کیو اسپتال چلاس منتقل کر دی گئی۔ ترجمان گلگت بلتستان حکومت فیض اللہ فراق کے مطابق اب تک سات افراد کی لاشیں نکالی جا چکی ہیں، جب کہ کئی افراد تاحال لاپتا ہیں۔

اندوہناک واقعہ چند روز قبل اس وقت پیش آیا جب لودھراں کی ایک فیملی اسکردو سے واپسی پر بابوسر کے قریب سیلابی ریلے کی زد میں آ گئی۔ حادثے میں ڈاکٹر مشعال فاطمہ اور ان کے دیور فہد اسلام جاں بحق ہو گئے تھے، جبکہ عبدالہادی لاپتا ہو گیا تھا۔

عینی شاہد اور جاں بحق فہد اسلام کے بیٹے عاصم کے مطابق، سیلابی ریلہ آیا تو ہم پہاڑ کے نیچے چھپنے کی کوشش کر رہے تھے، والد نے مشعال اور کزن کو بچانے کے لیے پانی میں چھلانگ لگائی اور خود بھی بہہ گئے۔

دوسری جانب وزیراعلیٰ گلگت بلتستان نے متاثرہ علاقوں کا دورہ کیا، ریسکیو آپریشن تیز کرنے اور شاہراہوں کی فوری بحالی کی ہدایت دی۔ بابوسر تھک، نیاٹ اور تھور کو آفت زدہ قرار دے کر ایمرجنسی نافذ کر دی گئی ہے۔