ٹی ٹوئنٹی ورلڈ کپ ویڈیو میں جے شاہ نمایاں، بھارتی فینز کی بی سی سی آئی پر تنقید

بھارتی کرکٹ بورڈ (بی سی سی آئی) کی جانب سے آئی سی سی ٹی ٹوئنٹی ورلڈ کپ جیتنے کے بعد جاری کی گئی ایک ویڈیو سوشل میڈیا پر تنقید کی زد میں آ گئی ہے۔ شائقین کا کہنا ہے کہ ویڈیو میں کھلاڑیوں کے بجائے بورڈ کے سیکریٹری کو زیادہ نمایاں کیا گیا ہے۔

بی سی سی آئی نے جشن کی ایک 37 سیکنڈز کی ویڈیو اپنے سوشل میڈیا اکاؤنٹس پر شیئر کی جس میں ٹیم کی کامیابی کے لمحات دکھائے گئے۔ تاہم ویڈیو کے بڑے حصے میں جے شاہ کو نمایاں طور پر دکھایا گیا۔

رپورٹس کے مطابق ویڈیو کے تقریباً 16 سیکنڈز کے مرکزی حصے میں سے 12 سیکنڈز تک جے شاہ کی موجودگی دکھائی گئی، جس پر سوشل میڈیا صارفین نے سوالات اٹھائے۔

Visuals that the whole nation will remember for ages 🇮🇳

🎥 Special moments of pure and unfiltered joy from #TeamIndia‘s historic triumph in the #T20WorldCup 2026 🏆🙌@ImRo45 | @GautamGambhir | @hardikpandya7 | @surya_14kumar | @JayShah #MenInBlue pic.twitter.com/wxyKqOmwLC

— BCCI (@BCCI) March 10, 2026

دلچسپ بات یہ ہے کہ ٹیم کی کامیابی میں اہم کردار ادا کرنے والے کھلاڑی سنجو سیمسن کی ویڈیو میں صرف ایک مختصر جھلک ہی شامل کی گئی۔

اس معاملے پر بھارتی کرکٹ شائقین نے مختلف سوشل میڈیا پلیٹ فارمز پر بی سی سی آئی کو تنقید کا نشانہ بنایا اور کہا کہ جشن کی ویڈیو میں کھلاڑیوں کو زیادہ نمایاں ہونا چاہیے تھا۔

کچھ صارفین کا کہنا تھا کہ ویڈیو کا مقصد ٹیم کی کامیابی کو اجاگر کرنا ہونا چاہیے تھا نہ کہ کسی انتظامی شخصیت کو نمایاں کرنا۔