تباہ کن بارشوں سے ملک بھر میں جانی و مالی نقصان، 221 افراد جاں بحق، 800 سے زائد مکانات تباہ

اسلام آباد: پاکستان بھر میں حالیہ موسلا دھار بارشوں نے قہر ڈھا دیا ہے، جن کے نتیجے میں جانی اور مالی نقصانات کی خوفناک تفصیلات سامنے آ رہی ہیں۔ قومی آفات کے انتظامی ادارے (NDMA) کی تازہ ترین رپورٹ کے مطابق اب تک 221 افراد مختلف حادثات میں جان کی بازی ہار چکے ہیں، جب کہ 804 سے زائد مکانات مکمل طور پر تباہ ہو چکے ہیں۔

سب سے زیادہ متاثرہ صوبہ پنجاب

رپورٹ کے مطابق سب سے زیادہ تباہی پنجاب میں ہوئی جہاں بارشوں اور ان کے نتیجے میں پیش آنے والے حادثات سے 135 افراد جاں بحق اور 470 زخمی ہوئے۔ صوبے میں 24 مکانات مکمل اور 168 مکانات جزوی طور پر تباہ ہوئے۔

خیبرپختونخوا: انسانی جانوں کے ساتھ ساتھ مکانات کو بھی شدید نقصان

خیبرپختونخوا میں طوفانی بارشوں کے باعث 40 افراد جان سے گئے جبکہ 69 زخمی ہوئے۔ یہاں 78 مکانات مکمل اور 142 مکانات جزوی طور پر منہدم ہو چکے ہیں۔

سندھ میں اب تک 22 افراد جاں بحق اور 40 زخمی ہوئے۔ یہاں 33 مکانات مکمل اور 54 مکانات جزوی طور پر تباہ ہو چکے ہیں۔

بلوچستان میں بھی صورتحال مختلف نہیں، جہاں 16 افراد جان کی بازی ہار گئے اور 4 افراد زخمی ہوئے۔ 8 مکانات مکمل جبکہ 56 مکانات جزوی طور پر متاثر ہوئے۔

گلگت بلتستان میں 3 افراد زخمی ہوئے جبکہ 66 مکانات مکمل اور 71 مکانات جزوی طور پر منہدم ہوئے۔

آزاد کشمیر میں 1 شخص جاں بحق اور 6 افراد زخمی ہوئے، جبکہ 17 مکانات مکمل اور 75 مکانات جزوی طور پر متاثر ہوئے۔

رپورٹ کے مطابق اسلام آباد میں بھی 1 شخص جاں بحق ہوا، جبکہ 35 مکانات جزوی اور 1 مکان مکمل طور پر منہدم ہوا۔

NDMA کے مطابق صرف گزشتہ 24 گھنٹوں کے دوران مزید 5 افراد جاں بحق ہوئے، جن میں 3 بچے بھی شامل ہیں، جبکہ 25 مکانات مکمل طور پر منہدم ہوئے اور 5 مویشی ہلاک ہوئے۔

اب تک مجموعی طور پر ملک بھر میں:

• 221 افراد جاں بحق

• سینکڑوں زخمی

• 804 مکانات مکمل تباہ

• 200 سے زائد مویشی ہلاک