ای بائیک اسکیم 2025، 14 اگست کو افتتاح متوقع

اسلام آباد، وفاقی حکومت نے ملک بھر میں ماحولیاتی مسائل سے نمٹنے اور پائیدار ٹرانسپورٹ کو فروغ دینے کے لیے ای بائیک اسکیم 2025 کا آغاز کر دیا ہے۔

اس اسکیم کا باضابطہ افتتاح وزیرِاعظم شہباز شریف کی جانب سے 14 اگست کو یومِ آزادی کی تقریبات کے موقع پر متوقع ہے۔

حکومت نے رواں مالی سال کے بجٹ میں 9 ارب روپے کی خطیر رقم مختص کی ہے، تاکہ اس اسکیم کے تحت عوام کو فائدہ پہنچایا جا سکے۔ ہر الیکٹرک بائیک پر 65 ہزار روپے سبسڈی دی جائے گی، تاکہ یہ موٹر سائیکلیں عوام کی دسترس میں ہوں۔

یہ اقدام حکومت کی اس پالیسی کا حصہ ہے جس کا مقصد ایندھن پر مبنی ٹرانسپورٹ سے چھٹکارا حاصل کرنا اور ماحولیاتی آلودگی میں کمی لانا ہے۔

حکام کے مطابق، یہ اسکیم نہ صرف موسمیاتی تبدیلی کے خلاف اقدامات میں مدد دے گی بلکہ طلبہ، ملازمین اور عام شہریوں کے لیے سستی اور مؤثر سفری سہولت بھی فراہم کرے گی۔