ناران، کاغان اور جھیل سیف الملوک جانے والے سیاحوں کے لیے داخلہ فیس لازم قرار

خیبر پختونخوا حکومت نے ناران، کاغان اور جھیل سیف الملوک سمیت دیگر خوبصورت سیاحتی مقامات پر آنے والے سیاحوں کے لیے داخلہ فیس لازم قرار دے دی ہے۔ اس نئے فیصلے کا مقصد سیاحتی سہولیات کو بہتر بنانا اور مقامی ترقیاتی اداروں کے مالی وسائل کو مستحکم کرنا ہے۔

سرکاری دستاویزات کے مطابق اب کوئی بھی سیاح فیس ادا کیے بغیر ان علاقوں میں داخل نہیں ہو سکے گا۔ اس سلسلے میں حسام آباد کے مقام پر ایک باقاعدہ فیس وصولی کا مرکز قائم کیا جائے گا، جہاں آنے والی تمام گاڑیوں سے فیس وصول کی جائے گی۔

نئی پالیسی کے تحت:

• بڑی گاڑیوں کے لیے فیس 200 روپے

• چھوٹی گاڑیوں کے لیے 100 روپے

• موٹرسائیکل کے لیے 20 روپے مقرر کی گئی ہے۔

مقامی رہائشیوں کو اس فیس سے مستثنیٰ قرار دیا گیا ہے۔

سیکریٹری سیاحت ڈاکٹر عبدالصمد کے مطابق یہ فیصلہ کاغان ڈویلپمنٹ اتھارٹی کی مالی حالت بہتر بنانے اور سیاحوں کو بہتر سہولیات فراہم کرنے کے لیے کیا گیا ہے۔ انہوں نے بتایا کہ یہ پالیسی بورڈ آف گورنرز سے باقاعدہ منظور ہو چکی ہے اور جلد نافذ کر دی جائے گی۔

حکام کا اندازہ ہے کہ اس داخلہ فیس سے ماہانہ لاکھوں روپے کا ریونیو حاصل ہوگا، جو کہ وادی کاغان میں سیاحتی ڈھانچے کی بہتری، صفائی، سڑکوں کی مرمت، اور دیگر سہولیات کے لیے استعمال کیا جائے گا۔

ڈاکٹر عبدالصمد کا کہنا تھا:
"داخلہ فیس کا مقصد صرف آمدن میں اضافہ نہیں بلکہ سیاحوں کو ایک بہتر اور محفوظ تجربہ فراہم کرنا ہے۔ اس سے نہ صرف علاقے کی قدرتی خوبصورتی کو محفوظ رکھنے میں مدد ملے گی بلکہ ترقیاتی کاموں میں بھی تیزی آئے گی۔”

وادی کاغان اپنی حسین وادیوں، معتدل موسم، اور جھیل سیف الملوک جیسے قدرتی نظاروں کی وجہ سے ہر سال ہزاروں ملکی و غیر ملکی سیاحوں کی توجہ کا مرکز بنتی ہے۔