معروف ہالی وڈ اداکار سمندر میں ڈوب کر ہلاک

لاس اینجلس: معروف امریکی اداکار اور ایمی ایوارڈ کے نامزد میلکم جمال وارنر 54 برس کی عمر میں کوسٹا ریکا میں تعطیلات کے دوران سمندر میں نہاتے ہوئے ڈوب کر جاں بحق ہو گئے۔

بین الاقوامی میڈیا اور رائٹرز کو قانون نافذ کرنے والے ذرائع نے تصدیق کی ہے کہ وارنر کو ساحل پر تعینات ریڈ کراس کے لائف گارڈز نے پانی سے نکالا، تاہم اس وقت تک وہ جان کی بازی ہار چکے تھے۔

میلکم جمال وارنر 1980 کی دہائی میں نشر ہونے والے مشہور امریکی ٹی وی شو "دی کاسبی شو” میں تھیو ہکسیٹیبل کے کردار سے دنیا بھر میں مشہور ہوئے۔ ان کی شاندار اداکاری پر 1986 میں ایمی ایوارڈ کے لیے نامزدگی بھی ملی۔

کوسٹا ریکا کے تفتیشی ادارے نے بتایا کہ ایک امریکی شہری جس کا آخری نام "وارنر” تھا، سمندر میں نہاتے ہوئے ڈوب گیا۔ اگرچہ ابتدائی طور پر نام ظاہر نہیں کیا گیا، تاہم متعدد ذرائع نے تصدیق کی ہے کہ وہ میلکم جمال وارنر ہی تھے۔

18 اگست 1970 کو نیو جرسی میں پیدا ہونے والے وارنر کا نام معروف سیاہ فام رہنما میلکم ایکس اور جاز موسیقار احمد جمال کے نام پر رکھا گیا تھا۔ ان کی والدہ پامیلا وارنر نے ان کے کیریئر کے آغاز سے لے کر شہرت تک منیجر کے طور پر خدمات انجام دیں۔

بچپن سے ہی اداکاری کے شوقین میلکم نے نیویارک کے پروفیشنل چلڈرن اسکول سے اداکاری کی تربیت حاصل کی۔ شروعات میں انہیں چھوٹے موٹے ٹی وی کردار ملے، لیکن "دی کاسبی شو” میں ان کی موجودگی نے انہیں گھر گھر پہچان دلائی۔

ان کے انتقال کی خبر سامنے آتے ہی دنیا بھر سے مداحوں، ساتھی فنکاروں، اور میڈیا شخصیات کی جانب سے گہرے دکھ اور خراجِ عقیدت کے پیغامات سامنے آ رہے ہیں۔ میلکم وارنر کو ایک باصلاحیت فنکار اور سیاہ فام اداکاروں کے لیے راستے ہموار کرنے والی شخصیت کے طور پر یاد کیا جا رہا ہے۔