فیلڈ مارشل عاصم منیر کا عزم: پاکستان کی سرزمین کا ایک انچ بھی دشمن کے حوالے نہیں ہوگا

فیلڈ مارشل سید عاصم منیر، نشانِ امتیاز (ملٹری)، ہلالِ جرات نے کہا ہے کہ جس طرح پاکستان نے روایتی میدان میں کامیابی حاصل کی، اسی طرح ہمارے پڑوسی کی ہر ریاستی پراکسی کو بھی مٹا دیا جائے گا۔ انہوں نے کہا کہ اسلام کی غلط تشریح کرنے والے مٹھی بھر گمراہ دہشت گردوں کے سامنے ہم کبھی نہیں جھکیں گے۔

پاکستان ملٹری اکیڈمی کاکول کی پاسنگ آؤٹ پریڈ سے خطاب کرتے ہوئے انہوں نے تمام مقامی و غیر ملکی کیڈٹس کو تربیت مکمل کرنے پر مبارکباد پیش کی۔ ان کا کہنا تھا کہ پاکستان کی مسلح افواج نے قوم کے تعاون سے ملکی دفاع میں ہمیشہ کلیدی کردار ادا کیا ہے۔

فیلڈ مارشل نے کہا کہ حالیہ آپریشن "معرکۂ حق / بنیانِ مرصوص” میں افواجِ پاکستان نے اپنی پیشہ ورانہ مہارت اور عزم کے ذریعے دشمن کو شکست دی اور قوم کا اعتماد مزید مضبوط کیا۔

”ہم اپنے وطن کا ایک انچ بھی دشمن کو نہیں دینے دیں گے“

انہوں نے کہا کہ پاکستان نے دشمن کے رافیل طیارے مار گرائے اور ایس-400 سسٹمز سمیت متعدد بیسز کو نشانہ بنایا، جس سے پاکستان کی ملٹی ڈومین وارفیئر صلاحیتوں کا بھرپور اظہار ہوا۔

عاصم منیر نے واضح کیا کہ پاکستان ایک فولادی دیوار کی مانند متحد ہے اور کوئی طاقت اس کے دفاع کو کمزور نہیں کر سکتی۔

بھارت کو خبردار

انہوں نے خبردار کیا کہ اگر بھارت نے دوبارہ جارحیت کی کوشش کی تو پاکستان کا جواب توقعات سے زیادہ سخت ہوگا۔ انہوں نے کہا کہ پاکستان کے ہتھیار بھارت کی جغرافیائی وسعت کے من گھڑت دفاعی تصور کو ختم کر دیں گے۔

فیلڈ مارشل نے کہا کہ نیوکلیئر ماحول میں جنگ کی کوئی گنجائش نہیں، لہٰذا بھارت اپنے مسائل پاکستان کے ساتھ برابری اور باہمی احترام کی بنیاد پر حل کرے۔

عالمی تعلقات اور امن کی کوششیں

عاصم منیر نے کہا کہ پاکستان ریجنل اسٹیبلائزر کے طور پر ابھر چکا ہے۔ انہوں نے سعودی عرب کے ساتھ دفاعی معاہدے کو مشرق وسطیٰ اور جنوبی ایشیا میں امن کے لیے اہم قرار دیا، جبکہ چین کے ساتھ اسٹریٹجک تعلقات اور امریکا سے بڑھتے ہوئے روابط کو خوش آئند قرار دیا۔

انہوں نے کہا کہ کشمیر پر پاکستان اپنے اصولی مؤقف پر قائم ہے اور غزہ میں امن کے لیے پاکستان کی سفارتی کوششوں کو عالمی سطح پر سراہا جا رہا ہے۔

قوم اور کیڈٹس کے نام پیغام

فیلڈ مارشل نے قرآن مجید کی سورۃ الصف آیت نمبر 4 کا حوالہ دیتے ہوئے کہا:

"بے شک اللہ ان لوگوں کو پسند کرتا ہے جو اس کی راہ میں صف باندھ کر لڑتے ہیں گویا وہ سیسہ پلائی ہوئی دیوار ہیں۔”

انہوں نے نوجوانوں کو پیشہ ورانہ مہارت، نظم و ضبط اور اخلاقی قیادت اپنانے کی تلقین کی اور جعلی خبروں اور غلط معلومات سے بچنے کا مشورہ دیا۔

آخر میں انہوں نے کہا:

“پاکستان کا پرچم انشاء اللہ ہمیشہ بلند رہے گا، کیونکہ اس کے محافظ یعنی پاکستانی قوم کبھی ناکام نہیں ہوتی۔”