وزیر خزانہ: پاکستان سرمایہ کاری کے لیے محفوظ ہو چکا

وفاقی وزیر خزانہ محمد اورنگزیب نے کہا ہے کہ پاکستان اب غیر ملکی سرمایہ کاری کے لیے ایک محفوظ ملک بن چکا ہے، اور عالمی ادارے بھی اب ہماری معاشی اصلاحات کو سراہ رہے ہیں۔ ان کے مطابق پاکستان میں سرمایہ کاری کے نئے مواقع پیدا ہو رہے ہیں جو معیشت کو مستحکم کر رہے ہیں۔

ایک انٹرویو میں وزیر خزانہ کا کہنا تھا کہ موسمیاتی تبدیلیوں کی وجہ سے سیلاب اور اسموگ جیسے مسائل بڑھ رہے ہیں، جو معیشت کو بھی متاثر کرتے ہیں۔ انہوں نے بتایا کہ اگر ان خطرات پر قابو نہ پایا گیا تو پاکستان کو تین ٹریلین ڈالر کی معیشت بنانے کا خواب متاثر ہو سکتا ہے۔

انہوں نے کہا کہ آج پاکستان اپنے وسائل سے ریلیف اور ریسکیو کے کام خود کرنے کے قابل ہے۔ تعمیر نو کے لیے اگر ضرورت ہوئی تو عالمی اداروں سے مدد لی جا سکتی ہے۔ ان کا کہنا تھا کہ امداد کی صورت میں گرانٹ لینا بہتر ہے، کیونکہ قرض واپس بھی کرنا ہوتا ہے۔

مزید پڑھیں: عالمی منڈی میں سونے کی قیمت میں ریکارڈ کمی

محمد اورنگزیب نے بتایا کہ ورلڈ بینک نے پاکستان کی ٹیکس اصلاحات پر دی گئی پریزنٹیشن کو سراہا ہے، اور ٹیکنالوجی کے استعمال سے کرپشن میں کمی آئی ہے۔ مصر کے وزیر خزانہ نے بھی پاکستان کی ٹیم کے ساتھ تجربات شیئر کرنے کی خواہش ظاہر کی ہے۔

وزیر خزانہ کا کہنا تھا کہ پاکستان اب غیر ملکی سرمایہ کاری کے لیے ایک محفوظ ملک بن چکا ہے، جس کی مثال نئی آنے والی بین الاقوامی کمپنیاں اور اسٹاک مارکیٹ میں نئے سرمایہ کار ہیں۔ یہ اعتماد اس بات کا ثبوت ہے کہ ملک کی معیشت درست سمت میں آگے بڑھ رہی ہے۔