حکومت کا یوٹیلٹی اسٹورز 31 جولائی تک بند کرنے کا فیصلہ

حکومت نے یوٹیلٹی اسٹورز کارپوریشن (یو ایس سی) کے تمام آپریشنز 31 جولائی 2025 تک بند کرنے کا فیصلہ کر لیا ہے۔

وزیر خزانہ محمد اورنگزیب کی زیرِ صدارت اجلاس میں بندش کے عمل، ملازمین کے لیے رضاکارانہ علیحدگی اسکیم (وی ایس ایس) اور آئندہ کے لائحہ عمل پر غور کیا گیا۔

اجلاس میں وی ایس ایس اسکیم کو مالی، قانونی اور انتظامی پہلوؤں سے مؤثر بنانے پر بات چیت ہوئی۔ اس کے علاوہ اثاثوں کی فروخت یا ممکنہ نجکاری کے لیے نجکاری کمیشن سے مشاورت کا فیصلہ بھی کیا گیا۔ وی ایس ایس اسکیم کا جائزہ لینے کے لیے اسٹیبلشمنٹ ڈویژن کی سربراہی میں ذیلی کمیٹی قائم کی گئی ہے۔ جو رواں ہفتے کے اختتام تک رپورٹ پیش کرے گی، جس کی بنیاد پر حتمی سفارشات وزیراعظم کو دی جائیں گی۔

یہ فیصلہ کفایت شعاری، غیر فعال اداروں کی بندش اور سرکاری اخراجات کم کرنے کی پالیسی کا حصہ ہے۔