آئی ایم ایف کے اعتراض پر حکومت کا یوٹرن، درآمدی چینی کا ٹینڈر واپس

اسلام آباد: حکومت نے درآمدی چینی پر ٹیکس چھوٹ پر آئی ایم ایف کے اعتراض کے بعد 3 لاکھ ٹن چینی کا جاری کردہ ٹینڈر واپس لے لیا ہے۔

تفصیلات کے مطابق ٹریڈنگ کارپوریشن آف پاکستان نے نیا ٹینڈر جاری کیا ہے، جس کے تحت صرف 50 ہزار میٹرک ٹن چینی درآمد کی جائے گی۔ عالمی سپلائرز سے 22 جولائی تک بولیاں طلب کی گئی ہیں۔

اس سے قبل حکومت نے 5 لاکھ ٹن چینی درآمد کرنے کا فیصلہ کیا تھا اور تمام ڈیوٹیز معاف کر دی گئی تھیں، تاہم آئی ایم ایف نے اس ٹیکس چھوٹ پر تحفظات ظاہر کیے۔

دوسری جانب چینی کی درآمد کی اجازت کے باوجود ایکس مل قیمت میں نمایاں اضافہ کیا گیا ہے۔ ذرائع کے مطابق چینی کی قیمت میں 25 روپے فی کلو اور صرف مارچ سے اب تک 6 روپے فی کلو اضافہ ہوا ہے۔

کابینہ دستاویزات کے مطابق جون 2024 میں ایکس مل قیمت 140 روپے فی کلو تھی جو مارچ 2025 میں 159 روپے فی کلو ہوگئی تھی۔ موجودہ قیمت 165 روپے فی کلو ہوگئی ہے (شوگر ملز سے طے شدہ معاہدہ)۔ وزارتِ نیشنل فوڈ سیکیورٹی نے گزشتہ روز نئی قیمت کا باقاعدہ اعلان کیا۔

یاد رہے، حکومت نے جون تا اکتوبر 2024 کے دوران 7.5 لاکھ ٹن چینی برآمد کرنے کی اجازت دی تھی۔