یرغمالیوں کے تبادلے کا تیسرا مرحلہ، حماس نے آٹھ قیدیوں کے نام جاری کر دیے

حماس نے یرغمالیوں کے تبادلے کے تیسرے مرحلے کیلئے آٹھ قیدیوں کے نام جاری کر دیے۔

اسرائیلی میڈیا کے مطابق تبادلے کے اگلے مرحلے میں تین اسرائیلی اور پانچ تھائی شہری رہا کیے جائیں گے۔ حماس کی جانب سے آٹھ یرغمالیوں کو کل رہا کیا جائے گا۔

اس سے قبل غزہ میں جنگ بندی معاہدے کے تحت یرغمالیوں کی رہائی کا دوسرا مرحلہ مکمل ہوا تھا۔ جس میں چار اسرائیلی خواتین کے بدلے اسرائیل نے دو سو فلسطینیوں کو آزاد کیا تھا۔ رام اللہ میں فلسطینی قیدیوں کا والہانہ استقبال کیا گیا تھا۔

رہائی کے وقت اسرائیلی خواتین خوش تھیں۔ سٹیج پر کھڑے ہو کر فلسطینی ہجوم کو ہاتھ ہلا کر الوداع بھی کہا۔ حماس نے اسرائیلی خواتین کو تحائف بھی دیے تھے۔

اسرائیلی جیل سے رہا ہونے والے فلسطینی قیدیوں کو بسوں کے ذریعے رملہ پہنچایا گیا تھا۔ جہاں جشن کا سماں بندھ گیا تھا۔ فلسطینی سالوں بعد اپنے پیاروں کو دیکھ کر آبدیدہ ہوگئے تھے۔ یرغمالیوں کی رہائی ہلال احمر تنظیم کے زیر نگرانی عمل میں لائی گئی۔

یرغمالیوں کی رہائی کے پہلے مرحلے میں تین اسرائیلی فوجی خواتین کے بدلے نوے فلسطینی رہا کیے گئے تھے۔