وزیرداخلہ محسن نقوی کا پاکستان کوسٹ گارڈز کی نئی بوٹس کا معائنہ!

کراچی: وفاقی وزیرداخلہ محسن نقوی نے کہا ہے کہ کوسٹ گارڈز کے فلیٹ میں دو نئی RHIB بوٹس کی شمولیت سے ادارے کی استعدادکار میں اضافہ ہوگا۔

کراچی بندرگاہ پر پاکستان کوسٹ گارڈز کیلئے 2 نئی بوٹس کی شمولیت کی تقریب سے خطاب کرتے ہوئے وزیر داخلہ محسن نقوی نے پاکستان کوسٹ گارڈز کی پیشہ وارانہ کارکردگی کو سراہا۔ انہوں نے مزید کہا کہ پاکستان کوسٹ گارڈز ملک کی ایک اہم اور قابل تعریف فورس کے طور پر پہچانی جاتی ہے۔

وزیر داخلہ نے کہا کہ کوسٹ گارڈز نے سمگلنگ، غیر قانونی تارکین وطن اور اینٹی ٹرالنگ فشنگ کی روک تھام کیلئے قانون کی عملداری یقینی بنائی ہے۔ کوسٹ گارڈز نے بالخصوص سمگلنگ، منشیات اور انسانی سمگلروں کے خلاف اعلی کارکردگی کا مظاہرہ کیا ہے۔

محسن نقوی نے بہترین کارکردگی پر کوسٹ گارڈز کے افسران اور اہلکاروں میں سرٹیفکیٹس تقسیم کیے۔ وزیرداخلہ کو گارڈ آف آنر پیش کیا گیا۔