ایران کے صدر پاکستان کے دو روزہ سرکاری دورے پر لاہور پہنچ گئے

ایران کے صدر مسعود پزشکیان اعلیٰ سطحی وفد کے ساتھ دو روزہ سرکاری دورے پر لاہور پہنچے۔

صدر مسلم لیگ ن نواز شریف اور وزیر اعلیٰ پنجاب مریم نواز نے ان کا پرتپاک استقبال کیا۔ علامہ اقبال انٹرنیشنل ائیر پورٹ پر پرچموں سے سجا ہوا ماحول اور ریڈ کارپٹ بچھایا گیا تھا۔

صدر پزشکیان نے مزار اقبال پر حاضری دی اور آج شام اسلام آباد روانہ ہوں گے جہاں ان کی صدر آصف علی زرداری، اسپیکر قومی اسمبلی سردار ایاز صادق اور چیئرمین سینیٹ یوسف رضا گیلانی سے ملاقاتیں شیڈول ہیں۔

دورے کے آغاز پر میڈیا سے گفتگو میں مسعود پزشکیان نے کہا کہ دورے کا مقصد دوطرفہ تجارتی اور اقتصادی تعلقات کو مضبوط کرنا ہے۔ سرحدی سلامتی اور علاقائی امن کے امور بھی زیر بحث آئیں گے۔ انہوں نے کہا کہ سرحدی منڈیوں اور رابطوں سے تعاون کے نئے مواقع پیدا ہو سکتے ہیں اور دوطرفہ تجارت کا ہدف 10 ارب ڈالر ہے۔

صدر پزشکیان نے کہا کہ ایران، پاکستان اور چین کے "ون بیلٹ ون روڈ” منصوبے میں فعال حصہ لینا چاہتا ہے، جو ایران کو یورپ سے جوڑنے کا اہم موقع فراہم کرے گا۔

انہوں نے واضح کیا کہ پاک ایران اسلامی اتحاد کو نقصان پہنچانے کی تمام کوششیں ناکام ہوں گی۔