نیتن یاہو نے غزہ جنگ بندی کے معاہدے پر کابینہ کی ووٹنگ کو روک دیا

جنگی جنون میں مبتلا اسرائیلی وزیر اعظم نیتن یاہو نے اپنی ہٹ دھرمی پر قائم رہتے ہوئے غزہ جنگ بندی کے معاہدے پر کابینہ کی ووٹنگ کو روک دیا ہے۔
اسرائیلی میڈیا کے مطابق غزہ جنگ بندی معاہدے کی منظوری اس وقت تک سرکاری نہیں ہوگی جب تک کہ اسرائیل کی سکیورٹی کابینہ اور حکومت کی جانب سے منظوری نہیں دی جاتی، معاہدے پر آج ووٹنگ ہونی تھی لیکن نیتن یاہو نے اسے روک دیا۔
اس سے قبل جنگ بندی معاہدے کے اعلان کے بعد اسرائیلی فوج نے غزہ کی پٹی پر حملے تیز کر دیے تھے۔ جس کے نتیجے میں کم از کم 73 فلسطینیوں جان کی بازی ہار گئے ہیں۔ غزہ میں اسرائیل کی جنگ میں 7 اکتوبر 2023 سے اب تک کم از کم 46,707 فلسطینی ہلاک اور 110,265 زخمی ہو چکے ہیں۔
پاکستان سمیت دنیا بھر کے ممالک نے غزہ میں جنگ بندی کے معاہدے کا خیر مقدم کیا ہے۔ صدر بائیڈن اور نو منتخب امریکی صدر ٹرمپ دونوں اس معاہدے کا کریڈٹ اپنےسر لے رہے ہیں۔
ادھر ، حماس کے عہدیدار عزت الرشیق کا کہنا ہے کہ قطر کے دارالحکومت دوحہ میں طے پانے والا یہ معاہدہ فلسطینی گروپ کی تمام شرائط کو پورا کرتا ہے، جس میں اسرائیلی افواج کا مکمل انخلاء، بے گھر افراد کی ان کے گھروں کو واپسی اور جنگ کا مستقل خاتمہ شامل ہے۔