اسرائیلی وزیر اعظم کے دفتر نے جنگ بندی معاہدے کی منظوری کی خبروں کی تردید کر دی

اسرائیلی وزیر اعظم بنجمن نیتن یاہو کے دفتر نے ان میڈیا رپورٹس کی تردید کی جس میں دعویٰ کیا گیا تھا کہ حماس نے یرغمالیوں کیلئے جنگ بندی کے معاہدے کی حتمی منظوری دیدی ہے۔

دفتر نے ایک بیان میں کہا کہ حماس نے ابھی تک اس معاہدے کا جواب نہیں دیا ہے۔

اس سے قبل اسرائیلی میڈیا نے دعویٰ کیا تھا کہ حماس نے غزہ جنگ بندی معاہدے کی منظوری دے دی ہے۔ معاہدے پر حماس کی منظوری کے بعد دستخط کا عمل شروع ہو جائے گا۔

اسرائیلی میڈیا کے مطابق چند گھنٹوں میں معاہدے کا حتمی اعلان سامنے آنے کا امکان ہے۔ معاہدے کے تحت ہر اسرائیلی قیدی کے بدلے 30 فلسطینی رہا ہوں گے۔ ہر اسرائیلی فوجی قیدی کے بدلے 50 فلسطینی رہا ہوں گے۔

واضح رہے کہ اس سے قبل قطر نے حماس اور اسرائیلی وفد کو جنگ بندی معاہدے کے حوالے سے حتمی مسودہ پیش کیا تھا۔ جس کی منظوری کے بعد جنگ بندی معاہدے پر دستخط ہونے تھے۔