جیمز ونس کا انگلینڈ کرکٹ بورڈ کے دوہرے معیار پر شکوہ

لندن: انگلینڈ کے بیٹر جیمز ونس کی انگلینڈ اینڈ ویلز کرکٹ بورڈ (ای سی بی)کے دوہرے معیار پر تنقید، کہا کھلاڑیوں کو پاکستان سپر لیگ (پی ایس ایل) میں شرکت پر پابندی کاسامنا کرنا پڑتا ہے جبکہ انڈین پریمیئر لیگ (آئی پی ایل)کیلئے کوئی پابندی نہیں ہے۔
جیمز ونس، جنہیں کراچی کنگز نے پی ایس ایل کیلئے برقرار رکھا ہے، نے کہا کراچی کنگز کے مالکان اور ٹیم مینجمنٹ کے ساتھ بات چیت ہوئی ہے۔ وہ فکر مند تھے کہ ڈرافٹ میں کھلاڑی کو منتخب کرنے کے بعداُن کو این او سی کا مسئلہ تو پیش نہیں آئے گا۔
انہوں نے کہا کہ پی ایس ایل ایک مختصر ٹورنامنٹ ہے، لہٰذا اگر آپ اس میں شرکت کرتے ہیں تو آپ شاید انگلینڈ کے ڈومیسٹک کرکٹ سے کم وقت کیلئے غیر حاضر رہوں گے، جبکہ آئی پی ایل میں شرکت کے دوران زیادہ میچز چھوٹ جاتے ہیں۔
واضح رہے کہ ای سی بی نے نومبر 2023 میں ایک پالیسی متعارف کرائی تھی، جو ان کھلاڑیوں کو بیرون ملک لیگز میں شرکت سے روکتی ہے جو انگلینڈ کے ڈومیسٹک سیزن کے دوران کھیلی جاتی ہیں، جیسےپی ایس ایل، کیریبین پریمیئر لیگ (سی پی ایل) اور میجر لیگ کرکٹ (ایم ایل سی)تاہم آئی پی ایل کیلئے این او سی فراہم کی جاتی ہے، حالانکہ اس کے میچز کاؤنٹی چیمپئن شپ سیزن کے ساتھ متصادم ہوتے ہیں۔
جیمز ونس نے اس فرق پر تبصرہ کرتے ہوئے کہا یہ شاید ای سی بی ، پی سی بی اور بی سی سی آئی کے تعلقات کا معاملہ ہے۔
جیمز ونس نے گزشتہ سال اعلان کیا تھا کہ وہ 2025 کے سیزن سے ریڈ بال کرکٹ چھوڑ دیں گے اور ہمپشائر کی کپتانی سے دستبردار ہو جائیں گے تاکہ وہ وائٹ بال کرکٹ پر توجہ دے سکیں اور پی ایس ایل میں شرکت کر سکیں۔