جاپان میں پہلی خاتون وزیراعظم منتخب

جاپان میں ایک تاریخی پیش رفت کے طور پر لبرل ڈیموکریٹک پارٹی (ایل ڈی پی) نے ہفتے کے روز سناے تاکائچی کو اپنا نیا رہنما منتخب کر لیا، جو ملک کی پہلی خاتون وزیرِ اعظم بننے جا رہی ہیں۔

64 سالہ قدامت پسند سیاستدان نے وزیرِ زراعت شنجیرو کوئزومی کو شکست دی، اور 185 ووٹ حاصل کیے جبکہ ان کے حریف کو 156 ووٹ ملے۔

یہ انتخاب اُس وقت عمل میں آیا جب سابق وزیرِ اعظم شیگیری ایشیبا نے ایوانِ بالا کے انتخابات میں شکست کے بعد استعفیٰ دے دیا۔

سناے تاکائچی، جو سابق وزیراعظم شنزو آبے کے قریبی ساتھیوں میں شمار ہوتی ہیں، اس سے قبل وزیرِ داخلہ و مواصلات کے طور پر خدمات انجام دے چکی ہیں۔ وہ اپنے سخت گیر موقف، دفاعی پالیسیوں اور قوم پرست نظریات کے لیے جانی جاتی ہیں۔

تاکائچی جاپان کی 104ویں وزیرِ اعظم ہوں گی اور ستمبر 2027 تک اپنے پیش رو کی مدت مکمل کریں گی۔

ان کی قیادت ایسے وقت میں سامنے آئی ہے جب حکمران جماعت ایل ڈی پی اندرونی اختلافات اور بدعنوانی کے اسکینڈلز کا سامنا کر رہی ہے۔ تجزیہ کاروں کے مطابق تاکائچی کو ملکی استحکام کے ساتھ ساتھ چین، جنوبی کوریا اور امریکا کے ساتھ تعلقات کے نازک توازن کو بھی برقرار رکھنا ہوگا۔

اپنی فتح کے بعد انہوں نے کہا، “ہم سب کو جاپان کی خاطر محنت کرنا ہوگی۔ میں دن رات کام کروں گی۔”

تاکائچی کی جانب سے متنازع یاسوکونی مزار کے دورے بھی ایک بار پھر سفارتی تنازع کا باعث بن سکتے ہیں، جہاں جنگِ عظیم دوم کے کچھ جنگی مجرموں کی یادگاریں بھی موجود ہیں۔

اس کے باوجود، ان کا وزیراعظم بننا جاپان کی سیاست میں خواتین کی شمولیت کے لیے ایک تاریخی سنگِ میل سمجھا جا رہا ہے۔