جاپانی "بابا وانگا” کی زلزلہ اور سونامی سے متعلق پیشگوئی

ٹوکیو: جاپان میں 5 جولائی کو شدید زلزلے اور سونامی سے متعلق ایک پرانی مانگا ناول کی پیشگوئی نے سوشل میڈیا پر خوف و ہراس پھیلا دیا، تاہم سائنسدانوں اور حکام نے ان خدشات کو بے بنیاد قرار دے دیا ہے۔

پیشگوئی کی اصل

مانگا ناول "The Future I Saw” کی مصنفہ ریو تاتسوکی، جنہیں "جاپانی بابا وانگا” کہا جاتا ہے، نے دعویٰ کیا تھا کہ بحرالکاہل میں ایک بڑا زلزلہ اور سونامی آسکتا ہے، جو 2011 کے تباہ کن توہوکو زلزلے سے بھی زیادہ شدید ہوگا۔

مصنفہ کی شہرت 2011 کے زلزلے کی مبینہ پیشگوئی کے بعد بڑھی، جب تقریباً 20 ہزار افراد ہلاک ہوئے تھے۔ اسی بنا پر ان کی تازہ پیشگوئی کو بعض سوشل میڈیا صارفین نے سنجیدہ لیا، خاص طور پر جاپان، چین، کوریا اور فلپائن میں۔

سائنسدانوں کا مؤقف

سائنسدانوں کا کہنا ہے کہ زلزلے کی پیشگوئی ممکن نہیں، اس کا کوئی سائنسی طریقہ موجود نہیں۔ حکام نے کہا کہ ناول میں بیان کردہ دعوے افسانوی اور قیاس آرائی پر مبنی ہیں۔ عوام افواہوں پر یقین نہ کریں۔ فیصلے صرف سائنس اور سرکاری وارننگز کی بنیاد پر کریں۔

جاپانی میڈیا اور سائنس دانوں نے ان پیشگوئیوں کو "غیر سائنسی اور خطرناک قیاس آرائیاں” قرار دیا ہے۔