ماہرین آثارِ قدیمہ نے قرونِ وسطیٰ کا اب تک کا سب سے بڑا ’سپر شپ‘ دریافت کر لیا

ماہرینِ آثارِ قدیمہ نے قرونِ وسطیٰ کے زمانے سے تعلق رکھنے والا اب تک کا سب سے بڑا سامان بردار بحری جہاز دریافت کر لیا ہے، جو شمالی یورپ میں اس دور کی تجارتی سرگرمیوں کو سمجھنے میں ایک اہم پیش رفت قرار دیا جا رہا ہے۔

یہ عظیم الشان جہاز، جسے سویلگیٹ 2 (Svelget 2) کا نام دیا گیا ہے، ڈنمارک کے دارالحکومت کوپن ہیگن کے ایک چینل سے دریافت ہوا۔ اس کی لمبائی 28 میٹر، چوڑائی 9 میٹر اور اونچائی تقریباً 6 میٹر ہے۔

محققین کے مطابق یہ کارگو جہاز تقریباً 1410 عیسوی کے آس پاس تیار کیا گیا تھا اور اندازہ ہے کہ یہ ایک وقت میں 300 ٹن تک سامان لادنے کی صلاحیت رکھتا تھا، جو اسے قرونِ وسطیٰ کا سب سے بڑا تجارتی جہاز بناتا ہے۔

ماہرین کا کہنا ہے کہ اس جہاز کی ساخت اس بات کا ثبوت ہے کہ اس دور میں بحری ٹیکنالوجی خاصی ترقی یافتہ تھی اور بڑے پیمانے پر تجارتی سامان کی ترسیل ممکن ہو چکی تھی۔

وائکنگ شپ میوزیم سے وابستہ بحری آثارِ قدیمہ کے ماہر اوٹو الڈم، جنہوں نے اس کھدائی کی قیادت کی، کا کہنا تھا کہ یہ دریافت بحری آثارِ قدیمہ کے شعبے میں ایک سنگِ میل کی حیثیت رکھتی ہے۔

ان کے مطابق یہ جہاز روزمرہ استعمال کی اشیاء کی بڑی مقدار میں تجارت کے لیے مؤثر انداز میں ڈیزائن کیا گیا تھا، جو قرونِ وسطیٰ کی معاشی سرگرمیوں کی وسعت کو ظاہر کرتا ہے۔

ماہرین کا کہنا ہے کہ اس دریافت سے قرونِ وسطیٰ میں شمالی یورپ کے تجارتی نیٹ ورکس، جہاز سازی اور معاشی روابط پر نئی تحقیق کے دروازے کھلیں گے۔