بھارت میں کروڑ پتی بھکاری کا انکشاف، تین گھر اور گاڑیوں کا مالک نکلا

بھارت میں ایک حیران کن واقعہ سامنے آیا ہے جہاں ایک بھکاری کروڑ پتی نکلا، جس کے پاس متعدد جائیدادیں اور گاڑیاں موجود ہونے کا انکشاف ہوا ہے۔

بھارتی میڈیا رپورٹس کے مطابق مدھیہ پردیش کے شہر اندور کے ایک مصروف بازار میں منگی لال نامی معذور شخص خاموشی سے لوہے کی ریڑھی پر بیٹھا رہتا تھا۔

وہ نہ تو بھیک مانگتا تھا اور نہ ہی راہگیروں کو آواز دے کر تنگ کرتا تھا، تاہم لوگ خود ہی اسے امداد دے دیا کرتے تھے۔

انسدادِ گداگری مہم کے دوران حکام کو معلوم ہوا کہ منگی لال روزانہ 400 سے 500 روپے بھیک سے کماتا تھا، مگر اس کی اصل آمدن کا ذریعہ کچھ اور تھا۔

تحقیقات میں سامنے آیا کہ وہ یہی رقم بازار کے تاجروں کو ایک دن یا ایک ہفتے کے لیے سود پر دیتا اور روزانہ بنیاد پر سود وصول کرتا تھا۔

حکام کے مطابق منگی لال کے پاس تین مکانات، تین آٹو رکشے اور ایک کار موجود ہے، جبکہ معذوری کی بنیاد پر اسے سرکاری رہائش بھی فراہم کی گئی تھی۔

مزید بتایا گیا کہ اس کے رکشے کرائے پر چلتے ہیں اور اس نے اپنی کار کے لیے ڈرائیور بھی رکھا ہوا ہے، جس کے بعد حکام نے کروڑ پتی بھکاری کو شیلٹر ہاؤس منتقل کر دیا ہے۔