ابوظہبی ٹی 10 لیگ 2025 کے لیے محمد عامر کوئٹہ کیولری کے کپتان مقرر

قومی کرکٹ ٹیم کے سابق فاسٹ بولر محمد عامر کو ابوظہبی ٹی 10 لیگ 2025 میں نئی فرنچائز کوئٹہ کیولری کا کپتان مقرر کر دیا گیا۔

فرنچائز مینجمنٹ نے عامر پر بھرپور اعتماد کا اظہار کرتے ہوئے انہیں ٹیم کی قیادت سونپ دی ہے۔ یہ محمد عامر کی ٹی 10 فارمیٹ میں بطور کپتان پہلی شرکت ہوگی، اور ٹیم انتظامیہ کے مطابق وہ نوجوان اسکواڈ کے لیے بہترین قائد ثابت ہوں گے۔

ٹیم مینجمنٹ کا کہنا ہے کہ عامر کا تجربہ، جارحانہ بولنگ اسٹائل اور میدان میں قائدانہ جذبہ کوئٹہ کیولری کو ایک مضبوط ٹیم کے طور پر ابھارے گا۔

کوئٹہ کیولری کا اسکواڈ متوازن قرار دیا جا رہا ہے، جس میں سکندر رضا، عباس آفریدی، محمد وسیم جونیئر، عرفان خان نیازی، خزیمہ بن تنویر اور عرفات منہاس جیسے نمایاں کھلاڑی شامل ہیں۔

یہ بھی پڑھیں : محمد عامر کی بابراعظم کے ساتھ لڑائی؟

محمد عامر نے قیادت ملنے پر خوشی کا اظہار کرتے ہوئے کہا کہ وہ کوئٹہ کیولری کو فائٹنگ یونٹ کے طور پر میدان میں اتاریں گے۔

"ٹی 10 ایک تیز، دلچسپ اور فیصلہ کن فارمیٹ ہے، میں پوری محنت کے ساتھ ٹیم کو بہترین نتائج کے لیے تیار کروں گا۔”

واضح رہے کہ ابوظہبی ٹی 10 لیگ 18 نومبر 2025 سے شروع ہوگی، جس میں دنیا بھر کے نامور کرکٹرز ایکشن میں دکھائی دیں گے۔ شائقین کرکٹ محمد عامر کی قیادت میں کوئٹہ کیولری سے شاندار کارکردگی کی امید کر رہے ہیں۔