مولانا فضل الرحمان کا یومِ یکجہتی کشمیر پر اظہارِ خیال

جمیعت علماء اسلام کے سربراہ مولانا فضل الرحمان نے کہا ہے کہ ہمارے حکمرانوں نے کشمیری عوام کے خون اور ناموس کو اپنی سیاست کے لیے استعمال کیا ہے اور 5 فروری ظلم کے خلاف جدوجہد، حق کی حمایت اور آزادی کی تحریک کا دن ہے۔

مولانا فضل الرحمان نے کہا کہ اقوام متحدہ کی قراردادوں پر عملدرآمد میں بھارت کا منفی رویہ اور ہٹ دھرمی کشمیری عوام کے حقِ خودارادیت کی راہ میں سب سے بڑی رکاوٹ ہے۔

انہوں نے مزید کہا کہ سات دہائیاں گزرنے کے باوجود اقوام متحدہ نے 1948 اور 1949 کی قراردادوں پر عملدرآمد کے لیے کوئی ٹھوس اقدامات نہیں کیے، اور عالمی برادری کو بھارت کے کشمیر پر غاصبانہ قبضے کا نوٹس لینا چاہیے۔

یومِ یکجہتی کشمیر: پاک افواج کا کشمیری عوام سے بھرپور اظہارِ یکجہتی

مولانا فضل الرحمان نے کہا کہ ہمارے حکمران کشمیریوں کی قربانیوں کو اپنی سیاسی سرگرمیوں کے لیے استعمال کر رہے ہیں، اور انصاف کے نام پر قائم اقوام متحدہ کب کشمیری عوام کے حق میں حرکت کرے گی؟

انہوں نے زور دیا کہ کشمیر کے شہیدوں کا خون رائیگاں نہیں جائے گا اور بھارت کے مظالم تاریخ کا سیاہ ترین باب ہیں۔

مولانا فضل الرحمان نے عالمی طاقتوں پر سوال اٹھایا کہ وہ بھارتی ظلم پر کب اپنی آواز بلند کریں گی اور کشمیری عوام کو انصاف دلائیں گی۔

جے یو آئی آج پورے ملک میں یومِ یکجہتی کشمیر بھرپور طریقے سے منائے گی تاکہ کشمیری عوام کی جدوجہد اور حق خودارادیت کی حمایت کی جائے۔