ملتان سلطانز کے مالک علی ترین نے پی سی بی کا لیگل نوٹس پھاڑ دیا

پاکستان سپر لیگ (پی ایس ایل) کی ٹیم ملتان سلطانز کے مالک علی ترین نے پی سی بی کا لیگل نوٹس پھاڑ دیا۔ سوشل میڈیا پر جاری ویڈیو پیغام میں علی ترین نے بتایا کہ پی ایس ایل مینجمنٹ نے انہیں ایک نوٹس بھیجا ہے جس میں تنقیدی بیانات واپس لینے اور معافی مانگنے کا مطالبہ کیا گیا تھا۔ نوٹس میں معاہدہ ختم کرنے اور بلیک لسٹ کرنے کی دھمکی بھی دی گئی۔

علی ترین نے کہا کہ وہ ان دھمکیوں سے خوفزدہ نہیں ہوں گے اور خاموش نہیں رہیں گے۔ ان کا کہنا تھا کہ اگر کسی کو لگتا ہے کہ وہ دباؤ میں آ جائیں گے تو یہ ان کی غلط فہمی ہے۔ انہوں نے واضح کیا کہ وہ پی ایس ایل کے مسائل کے حل کے لیے بات چیت کے حامی ہیں لیکن ابھی تک پی سی بی کی جانب سے کوئی رابطہ نہیں کیا گیا۔

اپنے ویڈیو پیغام میں علی ترین نے کہا کہ انہیں پی ایس ایل سے بے پناہ محبت ہے کیونکہ یہ لیگ پورے پاکستان کی ہے۔ انہوں نے کہا کہ کسی نے ان سے ان کے خدشات جاننے کے لیے ایک کال یا ای میل تک نہیں کی۔ وہ چاہتے ہیں کہ لیگ میں بہتری کے لیے باہمی بات چیت ہو، نہ کہ قانونی دھمکیاں دی جائیں۔

مزید پڑھیں: اظہر محمود کی بابر اعظم کو ڈومیسٹک کرکٹ کھیلنے کی ہدایت

علی ترین نے ذو معنی انداز میں معافی مانگتے ہوئے کہا کہ اگر پی ایس ایل مینجمنٹ میں قابل افراد کی شمولیت کا مطالبہ کرنے، ڈرافٹ اور تربیتی سہولیات پر بات کرنے یا افتتاحی تقریب پر تنقید کرنے سے کسی کو تکلیف پہنچی ہے تو وہ "معافی” مانگتے ہیں۔ ان کا کہنا تھا کہ ان کی باتوں کا مقصد لیگ کی بہتری تھا۔

آخر میں یہ واضح رہے کہ ملتان سلطانز کے مالک علی ترین نے پی سی بی کا لیگل نوٹس پھاڑ دیا اور دو ٹوک مؤقف اختیار کیا کہ وہ دھمکیوں سے پیچھے نہیں ہٹیں گے۔ پی سی بی کی جانب سے معاہدے کی خلاف ورزی کے الزامات لگائے گئے ہیں، تاہم علی ترین کا کہنا ہے کہ وہ صرف لیگ کی اصلاح اور بہتری چاہتے ہیں۔