نوشہروفیروز پولیس چوکی فائرنگ: 2 اہلکار جاں بحق

سندھ کے ضلع نوشہروفیروز میں نوشہروفیروز پولیس چوکی فائرنگ کے نتیجے میں 2 پولیس اہلکار جاں بحق ہوگئے۔ واقعہ بہریا روڈ کے قریب پیش آیا جہاں مسلح افراد نے اچانک پولیس چوکی پر اندھا دھند فائرنگ کردی اور موقع سے فرار ہوگئے۔ واقعے کے بعد علاقے میں خوف و ہراس پھیل گیا۔

پولیس کے مطابق جاں بحق اہلکار نائٹ ڈیوٹی پر تعینات تھے۔ فائرنگ کے نتیجے میں دونوں موقع پر ہی جاں بحق ہوگئے۔ اہلکاروں کی شناخت سعید سولنگی اور غلام حسین راجپر کے ناموں سے ہوئی ہے۔ دونوں اہلکار بہادری سے اپنے فرائض انجام دے رہے تھے۔

عینی شاہدین کے مطابق حملہ آور فائرنگ کے بعد جائے وقوعہ سے فرار ہوتے ہوئے اہلکاروں کا سرکاری اسلحہ بھی ساتھ لے گئے۔ واقعے کے فوراً بعد پولیس کی اضافی نفری موقع پر پہنچ گئی اور علاقے کو گھیرے میں لے لیا۔

مزید پڑھیں: اسلام آباد جی الیون کچہری خودکش دھماکا، 12 افراد شہید

لاشوں کو ضابطے کی کارروائی کے لیے مقامی اسپتال منتقل کردیا گیا ہے۔ ابتدائی شواہد اکٹھے کیے جا رہے ہیں جبکہ جائے وقوعہ سے گولیوں کے خول بھی برآمد ہوئے ہیں۔ پولیس نے شواہد کی بنیاد پر تحقیقات کا آغاز کر دیا ہے۔

پولیس ترجمان کے مطابق نوشہروفیروز پولیس چوکی فائرنگ میں ملوث ملزمان کی تلاش کے لیے خصوصی ٹیمیں تشکیل دے دی گئی ہیں۔ حکام کا کہنا ہے کہ اہلکاروں کے قاتلوں کو جلد گرفتار کر کے قانون کے کٹہرے میں لایا جائے گا اور علاقے میں سیکیورٹی مزید سخت کر دی گئی ہے۔