عمرہ کے بہانے خواتین کو سعودی عرب میں جبری بھیک منگوانے والا نیٹ ورک بے نقاب

ایف آئی اے نے انسانی اسمگلنگ میں ملوث ایک بین الاقوامی نیٹ ورک کو بے نقاب کر دیا ہے جو خواتین کو عمرہ کے بہانے سعودی عرب لے جا کر جبری بھیک منگوانے پر مجبور کرتا تھا۔

ایف آئی اے کمپوزٹ سرکل فیصل آباد نے کارروائی کرتے ہوئے گروہ کے مرکزی ملزم محمد شریف کو گرفتار کر لیا۔ محمد شریف سعودی عرب سے فیصل آباد پہنچنے پر ایئرپورٹ سے گرفتار ہوا۔ اس کے خلاف انٹرپول کے ذریعے بلیو نوٹس بھی جاری کیا گیا تھا۔

ایف آئی اے کے مطابق، اس نیٹ ورک کے دیگر دو اہم ملزمان ظہور احمد اور محمد غفور کو پہلے ہی گرفتار کیا جا چکا ہے۔

ترجمان کے مطابق، یہ گینگ معصوم شہریوں، خاص طور پر خواتین، کو "مفت عمرہ” اور روزگار کے جھوٹے وعدوں کے ذریعے سعودی عرب لے جاتا تھا۔ وہاں پہنچنے کے بعد متاثرہ خواتین کو باقاعدہ منصوبہ بندی کے تحت بھیک مانگنے پر مجبور کیا جاتا تھا۔

ایف آئی اے نے مزید انکشاف کیا ہے کہ اس گھناؤنے کاروبار میں کئی افراد ملوث ہیں، اور مزید تحقیقات کا آغاز کر دیا گیا ہے تاکہ نیٹ ورک کے دیگر ارکان کو بھی انصاف کے کٹہرے میں لایا جا سکے۔