شبلی فراز کے ناقابلِ ضمانت وارنٹ گرفتاری جاری، بانی پی ٹی آئی بھی طلب

کینٹ کچہری لاہور نے پی ٹی آئی رہنما شبلی فراز کے ناقابلِ ضمانت وارنٹ گرفتاری جاری کرتے ہوئے انہیں فوری طور پر گرفتار کر کے عدالت میں پیش کرنے کا حکم دے دیا۔

جوڈیشل مجسٹریٹ سہیل رفیق نے بانی پی ٹی آئی کی رہائش گاہ کے باہر اسلام آباد پولیس پر مبینہ حملے کے کیس کی سماعت کی۔ عدالت نے بانی پی ٹی آئی کو بھی 30 جولائی کو طلب کر لیا ہے، اور اس حوالے سے اڈیالہ جیل حکام کو سمن جاری کر دیے گئے۔

واضح رہے کہ یہ مقدمہ تھانہ ریس کورس میں درج ہے، جس میں شبلی فراز سمیت دیگر پر اسلام آباد پولیس پر حملے کا الزام ہے۔

گزشتہ روز اسی مقدمے میں پی ٹی آئی رہنما راجہ بشارت کو راولپنڈی الیکشن ٹریبونل کے باہر سے گرفتار کیا گیا تھا، تاہم ضمانتی دستاویزات کی تصدیق کے بعد انہیں رہا کر دیا گیا تھا۔