پاکستان اور افغانستان کے درمیان ترجیحی تجارتی معاہدہ طے پا گیا

پاکستان اور افغانستان کے درمیان ترجیحی تجارتی معاہدہ (PTA) طے پا گیا – ٹیکس شرح میں واضح کمی

پاکستان اور افغانستان کے درمیان تجارتی تعلقات میں ایک اہم پیش رفت ہوئی ہے، جہاں دونوں ممالک نے ترجیحی تجارتی معاہدہ (Preferential Trade Agreement – PTA) پر دستخط کر دیے ہیں۔ اس معاہدے کے تحت دو طرفہ درآمدات پر محصولات (ٹیکس) میں نمایاں کمی کی جائے گی۔

یہ معاہدہ افغانستان کے نائب وزیر تجارت و صنعت ملا احمد اللہ زاہد اور پاکستان کے سیکرٹری تجارت جواد پال نے بدھ کے روز اسلام آباد میں ایک رسمی تقریب کے دوران دستخط کیے۔

وزارتِ تجارت کے حکام کے مطابق، اس معاہدے کے تحت دونوں ممالک نے درآمدی اشیاء پر موجودہ 60 فیصد ٹیکس کم کر کے 27 فیصد کرنے پر اتفاق کیا ہے۔ معاہدہ 1 اگست 2025 سے نافذ العمل ہو گا اور ابتدائی طور پر ایک سال کے لیے مؤثر رہے گا، تاہم باہمی رضامندی سے اس میں توسیع کی جا سکے گی۔

• افغانستان پاکستان سے آنے والے آم، کینو، کیلا اور آلو پر ڈیوٹی کم کرے گا۔

• پاکستان افغانستان سے درآمد ہونے والے انگور، انار، سیب اور ٹماٹر پر ٹیکس کی شرح کم کرے گا۔

دونوں ممالک نے اس بات پر بھی اتفاق کیا ہے کہ ٹرانزٹ ٹریڈ ایگریمنٹ (Transit Trade Agreement) کے لیے ایک ٹیکنیکل کمیٹی تشکیل دی جائے گی تاکہ وسطی ایشیائی خطے سے گزرنے والے تجارتی راستوں کو بہتر بنایا جا سکے۔

وزارتِ تجارت کے حکام کا کہنا ہے کہ معاہدہ اب وفاقی کابینہ کی منظوری کے بعد باضابطہ طور پر نافذ کیا جائے گا۔