گوگل میسجز میں واٹس ایپ ویڈیو کال کا نیا فیچر متعارف کرانے کی تیاری

گوگل میسجز ایک نیا فیچر متعارف کرانے کیلئے کام کر رہا ہے جس کے تحت صارفین گوگل میسجز ایپ سے براہ راست واٹس ایپ ویڈیو کال کر سکیں گے۔

یہ فیچر گوگل میسجز کو استعمال کرنے والوں کیلئے ایک نئی سہولت فراہم کرے گا، جس سے وہ ایپ کو چھوڑے بغیر اپنے دوستوں یا اہل خانہ کے ساتھ ویڈیو کال کر سکیں گے۔

اینڈرائیڈ اتھارٹی کی رپورٹ کے مطابق جب آپ گوگل میسجز پر کسی فرد یا دوست سے چیٹ کر رہے ہوں گے اور آپ دونوں کے پاس واٹس ایپ اکاؤنٹس موجود ہوں گے تو ایپ کے اوپر دائیں جانب ایک نیا آپشن دکھائی دے گا۔

یہ آپشن ویڈیو آئیکون کی شکل میں ہوگا، اور جب آپ اس پر کلک کریں گے تو وہ آپ سے واٹس ایپ ویڈیو کال کے بارے میں پوچھے گا۔ آپ کے کلک کرنے پر ویڈیو کال کا آغاز ہو جائے گا اور آپ کو اس کے لیے گوگل میسجز ایپ سے باہر جانے کی ضرورت نہیں ہوگی۔

یہ فیچر ابتدا میں صرف ون آن ون چیٹس کے لیے دستیاب ہوگا، یعنی اگر آپ کسی گروپ چیٹ یا ایسے فرد سے بات کر رہے ہوں گے جس کا واٹس ایپ اکاؤنٹ نہیں ہوگا تو ویڈیو کال کا آپشن گوگل میٹ پر منتقل ہو جائے گا۔

فی الحال یہ واضح نہیں ہے کہ گوگل میسجز میں واٹس ایپ ویڈیو کال کیلئے کون سا میکنزم استعمال کیا جائے گا، تاہم اس فیچر کے متعارف ہونے کی توقع ہے۔ اس فیچر کی مکمل دستیابی میں کچھ ہفتے یا مہینے لگ سکتے ہیں، اور گوگل اس پر ابھی کام کر رہا ہے۔

اس فیچر کے ذریعے گوگل میسجز کے صارفین کو ایک نئے تجربے کا موقع ملے گا، جس سے واٹس ایپ ویڈیو کال کی سہولت کو مزید بہتر اور آسان بنایا جائے گا۔