صدر زرداری کی پرنس رحیم الحسینی سے ملاقات، والد کے انتقال پر اظہارِ تعزیت

لزبن: صدر مملکت آصف علی زرداری کی پرنس رحیم الحسینی سے ملاقات، والد پرنس کریم آغا خان کے انتقال پر اظہارِ تعزیت کیا۔

اس موقع پر صدر مملکت نے پاکستان کے عوام اور حکومت کی جانب سے دلی ہمدردی کا اظہار کرتے ہوئے کہا کہ پوری قوم ایک سچے دوست اور عظیم انسان دوست شخصیت سے محروم ہونے پر سوگوار ہے۔ انہوں نے کہا کہ مرحوم آغا خان کے انتقال سے گہرا صدمہ پہنچا۔

صدر مملکت نے مرحوم آغا خان کے پاکستان کی سماجی اور معاشی ترقی میں کردار کو سراہا۔ آصف علی زرداری نے کہا کہ مرحوم آغا خان کی دور اندیش قیادت نے پاکستان اور دنیا کے دیگر خطوں میں لوگوں کی زندگیوں کو بہتر کیا۔

صدر مملکت نے کہا کہ چین کے سرکاری دورے کے دوران آغا خان کے انتقال کی خبر ملی۔ مرحوم آغا خان کی انسان دوستی اور انسانیت کے لیے زندگی بھر کی خدمات کو خراج تحسین پیش کرنے لزبن آیا ہوں۔ انسانیت کے لیے مرحوم آغا خان کی خدمات کو ہمیشہ یاد رکھا جائے گا۔ انہوں نے کہا کہ امید ہے کہ پرنس رحیم الحسینی انسانیت کی خدمت کے اپنے والد کے مشن کو جاری رکھیں گے۔

واضح رہے کہ صدر مملکت پرنس کریم آغا خان مرحوم کی وفات پر تعزیت اور اُنہیں خراج عقیدت پیش کرنے کے لیے لزبن کے دورے پر ہیں۔ صدر کا دورہ پاکستان اور آغا خان خاندان کے درمیان گہری اور پائیدار دوستی اور پرنس کریم آغا خان کی میراث کے دیرپا اثرات کو اجاگر کرتا ہے۔