پی ٹی آئی نے 5 اگست احتجاج کیلئے تیاری کرلی

لاہور: پاکستان تحریک انصاف کا 5 اگست کو احتجاج کا معاملہ، پی ٹی آئی کی اعلی قیادت نے احتجاجی پلان کو حتمی شکل دے دیا۔

پارٹی ذرائع کے مطابق تمام ارکان قومی اسمبلی اور سینیٹرز کو اسلام آباد بلا لیا گیا۔ ارکان اسمبلی اور سینیٹرز اڈیالہ جیل کے باہر احتجاج کریں گے۔ ارکان صوبائی اسمبلی اپنے متعلقہ حلقوں میں احتجاج کریں گے۔ مرکزی قیادت کی تمام صوبائی صدور اور چیف آرگنائزرز سے مشاورت مکمل ہوگئی۔

احتجاج تحریک تحفظ آئین پاکستان کے پلیٹ فارم سے ہو گا۔ احتجاج کی مکمل نگرانی پی ٹی آئی کے سیکرٹری جنرل سلمان اکرم راجہ کریں گے۔

سندھ، بلوچستان، کے پی اور پنجاب کے ذمہ داران نے احتجاجی شیڈول اعلی قیادت کو پہنچا دیا۔ تمام ٹکٹس ہولڈرز کو بھی الرٹ کر دیا گیا ہے۔ صوبوں کے صدور اور کوارڈینیٹرز قیادت سے رابطے میں رہیں گے۔