روس یوکرین جنگ: ٹرمپ کا جنگ بندی پر اصرار

برطانوی اخبار فنانشل ٹائمز کی رپورٹ کے مطابق ٹرمپ کا یوکرینی صدر کو جنگ بندی کے لیے پیوٹن کی شرائط ماننے پر زور دینا اہم پیشرفت کے طور پر سامنے آیا ہے۔ یہ ملاقات دو روز قبل وائٹ ہاؤس میں ہوئی جس میں روس یوکرین جنگ پر بات چیت کی گئی۔

رپورٹ کے مطابق صدر ٹرمپ نے یوکرینی صدر ولادیمیر زیلینسکی کو بتایا کہ روسی صدر پیوٹن نے دھمکی دی ہے کہ اگر یوکرین نے شرائط نہ مانیں تو روس حملے تیز کر دے گا اور یوکرین کو تباہ کر دے گا۔ ٹرمپ نے اس صورتحال کو سنجیدہ خطرہ قرار دیا۔

صدر ٹرمپ نے خاص طور پر زور دیا کہ یوکرین مشرقی علاقے ڈونباس کو روس کے حوالے کر دے تاکہ جنگ بندی ممکن ہو سکے۔ ان کا کہنا تھا کہ خون خرابہ اب بند ہونا چاہیے اور فریقین کو ایک معاہدے تک پہنچنا چاہیے۔

مزید پڑھیں: ڈونلڈ ٹرمپ: اگر چاہوں تو پاک افغان تنازع ختم کر سکتا ہوں

فنانشل ٹائمز کے مطابق یوکرینی صدر زیلینسکی نے ٹرمپ کو موجودہ جنگی پوزیشن پر جنگ بند کرنے پر آمادہ کیا۔ ملاقات کے بعد صدر ٹرمپ نے کہا کہ دونوں ممالک موجودہ پوزیشن کو تسلیم کر کے جنگ روک دیں، اور فیصلہ تاریخ پر چھوڑ دیں۔

ٹرمپ کا یوکرینی صدر کو جنگ بندی کے لیے پیوٹن کی شرائط ماننے پر زور دینا ایک اہم عالمی سیاسی پیغام ہے، جس سے روس یوکرین جنگ کے مستقبل پر گہرے اثرات مرتب ہو سکتے ہیں۔