چوری کے دوران سیف علی خان پر حملہ کرنے والا شخص گرفتار

بھارتی پولیس نےبالی ووڈ اداکار سیف علی خان پر ڈکیتی کے دوران چاقو سے حملہ کرنے والے شخص کو گرفتار کر کے تفتیش شروع کر دی ہے۔
گزشتہ روز بھارتی پولیس نے نامور اداکار پر چاقو سے حملے میں ملوث ملزم کی تصویر جاری کی تھی۔جس کے بعد پولیس نے ملزم کو گرفتار کرنے کیلئے ٹیمیں تشکیل دیں تھیں۔ آپریشن کے دوران پولیس نے کئی مزدوروں کو حراست میں لے کر تفتیش کی تھی۔
پولیس کا کہنا ہے کہ سیف کے گھر چوری کی غرض سے گھسنے والے شخص کو اداکار کی عمارت کا علم تھا ۔ ملزم کو گھر میں داخل ہونے کیلئےگھر کے اندر سے مدد فراہم کی گئی تھی۔
واضح رہے کہ ایک شخص نے ڈکیتی کی نیت سے سیف علی خان اور کرینہ کپور کے گھر میں گھسنے کی کوشش کی۔ جب سیف نے گھسنے والے کا سامنا کیا تو حملہ آور نے ان پر چاقو سے حملہ کیا اور پھر موقع سے فرار ہوگیا۔
بھارتی میڈیا کے مطابق حملے میں بھارتی اداکار شدید زخمی ہوئے تھے۔ سیف علی خان کے بیٹے ابراہیم نے اپنے والد کو آٹو رکشہ میں ہسپتال پہنچایا ۔ جہاں اُن کی کامیاب سرجری کی گئی۔
ڈاکٹروں کا کہنا ہے کہ سیف علی خان ٹھیک ہیں اور اُن کو جلد ہی ہسپتال سے ڈسچارج کر دیاجائے گا۔