خیبر پختونخوا کے سابق وزیروں کے زیر استعمال کئی سرکاری گاڑیاں

خیبر پختونخوا کی سابق کابینہ کے بیشتر ارکان کے پاس اب بھی سرکاری گاڑیاں موجود ہیں جنہیں ابھی تک واپس نہیں کیا گیا۔ حکومتی ہدایات کے باوجود یہ گاڑیاں سابق وزراء کے زیرِ استعمال ہیں۔

ذرائع کے مطابق 11 سابق ارکان اسمبلی نے تاحال ایک بھی گاڑی واپس نہیں کی۔ ایک سابق وزیر کے پاس 8 اور دوسرے کے پاس 5 سرکاری گاڑیاں ہیں۔ اس کے علاوہ تین سابق وزیروں کے پاس 3،3 گاڑیاں موجود ہیں۔

کچھ سابق وزراء کا کہنا ہے کہ انہوں نے ان گاڑیوں کی مرمت اور دیکھ بھال پر اپنی جیب سے لاکھوں روپے خرچ کیے ہیں، جبکہ کئی وزراء دوبارہ کابینہ میں شامل ہونے کی امید پر گاڑیاں اپنے پاس رکھے ہوئے ہیں تاکہ وزارت ملنے پر وہی گاڑیاں دوبارہ استعمال کر سکیں۔

مزید پڑھیں: وزیر خزانہ: پاکستان سرمایہ کاری کے لیے محفوظ ہو چکا

وزیر اعلیٰ خیبر پختونخوا سہیل آفریدی نے تمام سابق وزراء کو ہدایت دی ہے کہ وہ فوری طور پر گاڑیاں واپس کریں، تاہم زیادہ تر افراد نے ان احکامات پر عمل نہیں کیا۔ سابق وزیر اعلیٰ علی امین گنڈاپور اور وزیر فخر جہاں وہ چند افراد ہیں جنہوں نے گاڑیاں واپس کر دی ہیں۔

اب بھی خیبر پختونخوا کی سابق کابینہ کے کئی ارکان کے پاس سرکاری گاڑیاں موجود ہیں، جس سے نہ صرف حکومتی املاک کا غلط استعمال ہو رہا ہے بلکہ قواعد و ضوابط کی خلاف ورزی بھی ہو رہی ہے۔