شہباز شریف اور فیلڈ مارشل عاصم منیر کی ایرانی صدر سے ملاقات

دوحہ: وزیراعظم شہباز شریف اور ایرانی صدر مسعود پزشکیان نے دوحہ میں اعلیٰ سطحی ملاقات میں مسلم دنیا میں اتحاد کی اہمیت پر زور دیا۔

ملاقات میں پاکستان کے نائب وزیراعظم اسحاق ڈار، فیلڈ مارشل عاصم منیر اور وزیر دفاع خواجہ آصف بھی موجود تھے۔ دونوں رہنماؤں نے مسلم ممالک کے درمیان یکجہتی اور پاکستان اور ایران کے تعلقات کو مزید مضبوط بنانے پر بات کی۔

اس موقع پر وزیراعظم شہباز شریف نے اسرائیلی جارحیت کی سخت مذمت کی اور قطر کے ساتھ پاکستان کی مکمل یکجہتی کا اعادہ کیا۔ انہوں نے ایران کے ساتھ تعلقات کو مزید فروغ دینے کی خواہش ظاہر کی اور کہا کہ دوحہ سمٹ نے اسرائیل کے لیے واضح اور متحد پیغام بھیجا ہے۔

وزیراعظم نے ایران کے سپریم لیڈر آیت اللہ خامنہ ای کے لیے نیک خواہشات کا اظہار بھی کیا۔ ایرانی صدر مسعود پزشکیان نے پاکستان کے فلسطین پر موقف کی تعریف کی اور دونوں ممالک نے علاقائی امور پر قریبی رابطے جاری رکھنے پر اتفاق کیا۔