سہیل آفریدی کا مؤقف بچگانہ ہے، طلال چوہدری

وزیر مملکت برائے داخلہ طلال چوہدری نے وزیراعلیٰ خیبرپختونخوا سہیل آفریدی کی طرف سے وفاق کی دی گئی بلٹ پروف گاڑیاں ناقص قرار دے کر واپس کرنے کے فیصلے پر سخت ردعمل دیا ہے۔ انہوں نے کہا کہ یہ فیصلہ غیر سنجیدگی پر مبنی ہے اور پولیس کے تحفظ کو خطرے میں ڈالنے کے مترادف ہے۔

طلال چوہدری کا کہنا تھا کہ وفاقی حکومت نے خیبرپختونخوا پولیس کو جدید بلٹ پروف گاڑیاں عالمی معیار کے مطابق فراہم کی تھیں تاکہ دہشت گردی کے خلاف جنگ میں ان کی حفاظت یقینی بنائی جا سکے۔ لیکن صوبائی حکومت نے ان گاڑیوں کو ناقص قرار دے کر واپس کرنے کا فیصلہ کیا، جو کہ ایک بچگانہ سوچ کی عکاسی کرتا ہے۔

وزیر مملکت نے الزام عائد کیا کہ خیبرپختونخوا حکومت پولیس کو دہشت گردوں کے رحم و کرم پر چھوڑ رہی ہے۔ انہوں نے مزید کہا کہ وفاق پہلے ہی 600 ارب روپے سے زائد فنڈز خیبرپختونخوا حکومت کو فراہم کر چکا ہے، لیکن اس خطیر رقم کا کوئی واضح حساب نہیں دیا گیا۔

مزید پڑھیں: سیلاب متاثرین کی مدد کے لیے کسی سے مدد نہیں مانگی، مریم نواز

دوسری طرف وزیراعلیٰ سہیل آفریدی کا مؤقف ہے کہ وفاقی حکومت کی جانب سے دی گئی بلٹ پروف گاڑیاں پرانی اور ناقص ہیں، اس لیے انہیں واپس کیا جا رہا ہے۔ انہوں نے کہا کہ صوبائی حکومت پولیس کے تحفظ کو سنجیدگی سے لیتی ہے، لیکن ناقص گاڑیوں سے تحفظ کا مقصد حاصل نہیں ہو سکتا۔

وزیر مملکت برائے داخلہ طلال چوہدری نے سہیل آفریدی کے فیصلے کو ایک بار پھر غیر سنجیدگی پر مبنی قرار دیتے ہوئے کہا کہ ایسی سوچ سے پولیس فورس کا مورال متاثر ہو گا اور ان کے لیے مزید خطرات پیدا ہوں گے۔ ان کے بقول، حکومت کو سنجیدہ فیصلے لینے چاہئیں تاکہ پولیس فورس کو مکمل تحفظ فراہم کیا جا سکے۔