جوڈیشل کمیشن نے اجلاس میں 6 ججز کی سپریم کورٹ میں تعیناتی کی منظوری دیدی

اسلام آباد: جوڈیشل کمیشن آف پاکستان کے آج کے اجلاس کا اعلامیہ جاری، اجلاس میں 6 ججز کی سپریم کورٹ میں تعیناتی کی منظوری دی گئی۔

اعلامیے کے مطابق جوڈیشل کمیشن آف پاکستان کا اجلاس چیف جسٹس یحییٰ آفریدی کی زیر صدارت ہوا، اجلاس میں سپریم کورٹ میں اضافی ججز کا معاملہ زیر غور آیا۔ اجلاس میں چیف جسٹس بلوچستان ہائی کورٹ جسٹس ہاشم کاکڑ کی سپریم کورٹ تعیناتی کی منظوری دی گئی، چیف جسٹس سندھ ہائیکورٹ جسٹس محمد شفیع صدیقی کی بھی سپریم کورٹ تعیناتی کی منظوری دی گئی۔

اعلامیے میں کہا گیا کہ اجلاس میں سندھ ہائیکورٹ کے جسٹس صلاح الدین پنہور اور پشاور ہائیکورٹ کے جسٹس شکیل احمد کی سپریم کورٹ تعیناتی کی منظوری بھی دی گئی۔ اس کے علاوہ چیف جسٹس اسلام آباد ہائیکورٹ جسٹس عامر فاروق اور چیف جسٹس پشاور ہائیکورٹ جسٹس اشتیاق اِبراھیم کی سپریم کورٹ تعیناتی کی منظوری بھی دی گئی۔

اعلامیے کے مطابق کمیشن کی جانب سے اسلام آباد ہائیکورٹ کے جسٹس میاں گل حسن اورنگزیب کی سپریم کورٹ کے قائم مقام جج کے طور پر تعیناتی کی منظوری دی گئی۔